Lơ 13/1, mbơh nau bah nkô̆ ta rơh rƀŭn lam dak mpeh nau rgâl hun hao khoa học, công nghệ, rgâl blau mhe ndrel rgâl mrô neh dak, Uỷ viên Bộ chính trị, Kruanh Quốc hội Trần Thanh Mẫn lah rjăp lŏ rgum ƀư kơp, nchră, rƀŭn rgum tât nau ƀư nau kan, pháp luậtl tâm ban nau kan “leo nau mhe jêng nau ntur rlong”.

            Tâm nau nê, Quốc hội mra rgum tâm ăp nau kan, ntrong kan tơm kơt n’hao nau gĭt, ntrơn rgâl mrô. Lơ 10/1/2025, Đảng đoàn Quốc hội hŏ ntrŭnh nau nchrăp kan mrô 3260 gay ƀư nau ntrŭnh, tâm nê năl kloh nkô̆, nau kan, pă kloh nau kan, n’hêl, ngăch ndrel ƀư tâm nuih n’hâm njăch ndăn, nsôih prêh, ntrŭnh kloh nau kan bah nŭih dâk bôk, cán bộ, công chức, viên chức, nŭih pah kan; nchră tât nau săk tam bah nau ntrơn rgâl mrô, dŏng nau dơi khoa học, công nghệ tâm nau ƀư kan, nau kan; ƀư ueh nuih n’hâm rgâl blau mhe, leo trong lor, janh mĭn, janh ndơn nau kan:

            ‘Ngăn lah, tâm rơh rƀŭn lôch bah Chính phủ năm 2024 mhe rlau, đồng chí Tổng Bí thư Tô Lâm lŏ lah rjăp: Ntrong kan pháp luật ân geh ƀư jehe, gay ăp nkô̆ ntrŭnh n’hêl tâm du nau nchrăp luật. Mât tĭng nau tă geh, ân jăng lơi nau dăn-ân ndrel ƀư nau kan; rgâl mhe nau ntop pă tơm prăk nsing tâm nau tă geh bah trong luh, ntrơn bah prăk jêng nau kan mêt uănh ba kơi. Nau kan mât khoa học ân geh nsôih gay rgâl mhe, blau mhe kơt nuih n’hâm “nchrăp 10’ tâm tuch tăm”.

            Tâm nau kan Chính phủ mbơh ndrel ƀư Bôk nau kan ndâk njêng Luật, pháp lệnh, Quốc hội mra geh nau rgop, uănh bah ăp nau nchrăp Luật tâm 6 nau kan tơm: Mpeh khoa học, công nghệ mrô: ƀư jêh 8 Luật. Mpeh ntuh kơl tơm prăk: kơp, ƀư jêh 12 Luật. Mpeh ntŭk kan, cán bộ, công chức, ntĭm nti, hun hao nŭih kan: Kơp, rgâl nkra, ƀư jêh 11 Luật. Mpeh tăch rgâl: Kơp, ƀư jêh 3 Luật. Mpeh đăp mpăn, rnă njrăng tâm trong mạng, ntŭk ntu mrô, ƀư jêh 3 Luật. Mpeh ntrơn rgâl mrô, dŏng khoa học, công nghệ, rgâl blau mhe: ƀư jêh nau kan pháp lý gay ntrŭt dăng nau ndâk, dŏng Quốc hội mrô, Chính phủ mrô, N’gâng kan mrô. Êng nê, lŏ kơp, ndâk mhe ăp nau ntrŭnh pháp luật êng geh tât. Tâm nuih n’hâm nê tĭng Kruanh Quốc hội Trần Thanh Mẫn:

            “Bah năp măt lah ndal nchrăp, nsôih ntrŭnh ƀư Bôk nau kan ndâk luật, pháp lệnh năm 2025. Đă Rnâng kan Đảng Chính phủ, ăp n’gâng kan, ntŭk kan: Uănh khlay nau ƀư, rgum nau nchră, kơp, uănh, đă rgâl nkra, ntop tay, ndâk mhe pháp luật tâm nau kan khoa học, công nghệ, ntrơn rgâl mhe, ntrơn rgâl mrô đăp mpăn nau nâp, nau ngăch tĭng nau ntrŭnh”.

            Đah HĐND ăp gưl, Kruanh Quốc hội đă, nsing tâm nau ngăn, tâm rgop ntrŭnh ƀư nau kan, tĭng nau dơi gay bonh đă, ntrŭt dăng hun hao nau mĭn njêng khoa học, công nghệ, ntrơn rgâl mhe, ntrơn rgâl mro, n’hao nau tam, nau dơi, nâp bah nau kan ntŭk kan Ngih dak, tăch rgâl, ntŭk ƀư nau kan, êng nŭih tâm nkuăl.

            Kruanh Quốc hội Trần Thanh Mẫn ân lah, nau ngăn bah neh dak dôl ndŏ luh ăp nau ndal ân geh rklaih, ƀon lan dôl kâp rnơm ndrel ŭch tâm ăp nau ntrŭnh bah Đảng, Ngih dak. Tâm nuih n’hâm nê, Quốc hội mra lŏ rgâl dăng, n’hao nau nâp, nau tam nau kan, kơt nau mbơh bah Tổng Bí thư Tô Lâm tâm rơh rƀŭn lôch nau kan năm 2024, ntrŭnh ƀư kan năm 2025 bah Chính phủ ndrel n’gâng kan, lah: rnôk aơ neh dak nơm hŏ geh nau dăng, tŏng n’hâm nsôih gay lăp tâm rach năm n’hao săk hun hao dăng, nâp nâl bah rnoi mpôl; ăp nau dơi dôl tât ma nơm ân geh ndăn năn, yor lah ân rlau ri nơm mô geh nau dơi ma ăp nau tă bah ơm ndrel tih ma ƀon lan./.