Tât râng ndrel ƀư tơm nar tâm mâp măt ăp rơh ntoh măt Quốc hội bah ăp rơh, Tổng Bí thư Tô Lâm lah rjăp, 80 năm nkah tay, trong hun hao bah Quốc hội Việt Nam lah nau nâp, blau mhe ndrel mrô rlu rgâl mhe. Ntơm bah nau săch kan lơ 6/1/1946, nau săch kan bôk năp tâm dak nơm, Quốc hội hŏ đă ăp nau kan khlay bah neh dak: Nchră Hiến pháp, ndâk nau kan pháp lý ân du neh dak đăp mpăn; ntrŭnh ntrong kan mhe, mêt uănh gưl prêh nau kan bah Ngih dak; nkre nchră nau nghị viện, rgop nau n’hao nau dăng dơi bah neh dak tâm lam ntur neh:

            ‘Phung he ryơk Quốc hội mô knŭng kơt nau dơi nâp bah Ngih dak prêh ngăn, ma ê lor lah du Ngih nsum bah ăp nŭih ntoh măt ƀon lan, tă geh ndơn tâm săk nơm nau kan jâk ma prêh khlay: djăt ƀon lan, ngơi nau bah ƀon lan, mât nau geh dơi ueh ngăn bah ƀon lan”.

            Mbơh nau tât rlau 2.200 ntoh măt râng rbŭn mpeh du đê̆ nau dơi kŏ kơt lah nau rƀŏng hun hao neh dak tâm rơh tât, ngăn lah nau nsôih ƀư nau dơi nau ntrŭnh Đại hội ntoh măt Đảng lam dak tal 13 ndrel nchrăp ân nau ueh gay ƀư dơi Đại hội ntoh măt lam dak tal XIV bah Đảng, đăp mpăn ƀư dơi bar nkô̆ nau 100 năm ma Đảng nơm nchrăp luh. Tổng Bí thư mbơh kloh 3 nau kan tơm, nê lah, đăp mpăn neh neh, nkuăl neh, mât đăp mpăn, rnă njrăng nau rêhl hun hao neh dak ngăch ndrel nâp nâl ndrel mô rlu hun prêh, tŏng dơi nau ŭch mpeh nau rêh drăp ndơ nuih n’hâm bah ƀon lan. Aơ kŏ lah nkô̆ tơm prêh ngăn bah Đảng, bah Chủ nghĩa xã hội. Mpeh nau dăp rgum ntŭk kan bah trong kan chính trị, ƀư tay ntŭk kan hành chính bah neh dak gay hun hao, Tổng Bí thư Tô Lâm mbơh:      

            ‘Nau kan pah kan bah ăp ntŭk kan, rmôt kan tâm ntrong kan chính trị 3 gưl, ngăn lah gưl xã pah kan tâm ban, n’ho ro, ngăn lah tŏng dơi nau ŭch bah ƀon lan, kơl an ƀon lan ueh lơn, nơih lơn. Nau tâm boh đah gưl kan Trung ương, gưl n’gor ndrel gưl xã dôl ma geh nau dơi lơn tâm du ntrong kan hành chính mhe.nau ƀư, dăp rgum tay nau kan kơl an n’gâng kan mât nau rêh, mât nkuăl ueh tam lơn, blau lơn, rgâl hành chính rjăp ndrel jru, tâm dăch ma nau dơi lơn, ƀon lan geh kơl an ngăch, ueh lơn”.   

            Tâm nar mâp măt, Kruanh Quốc hội Trần Thanh Mẫn lah uehTrung ương Đảng, Bộ Chính trị, Ban Bí thư ăp năm kan; ryơk lah ueh mpeh nau tâm rnglăp, tâm rnơm, hăn ndrel, kơl an ngăn, năn, săk tam bah Chính phủ, ăp ntŭk kan tư pháp, MTTQ, ăp ntŭk kan, ăp nkuăl ndrel ƀon lan lam dak; ntoh nau ryợk mpeh ăp nau kơl an bah ăp rơh ntoh măt Quốc hội bah ăp rơh. Kruanh Quốc hội Trần Thanh Mẫn ŭch, ăp ntoh măt Quốc hội mât nau tâm boh rjăp, ueh ma Đảng, Ngih dak ndrel ƀon lan:

            ‘Lŏ kơl ƀư nau kan ân Quốc hội, ân nau kan cách mạng têh dăng bah Đảng, bah rnoi mpôl nơm, kơt Tổng bí thư Tô Lâm hŏ tă lah: “uănh tay gay ma hăn tât, nkah gay ma nkah ndrel ndơn choat”. Lăp tâm rnôk mhe, neh dak nơm dôl dâk bah năp nau tât ndrel nau kan têh, yơn kŏ mô đê̆ nau jêr, ntul rlong. Quốc hội mra lŏ ƀư nau ntrŭnh bah Đảng, djăt nau đă bah cử tri, ƀon lan ndrel ntŭk kan; hăn ndrel ma Chính phủ, tâm rgop ma ăp ntŭk kan, ƀư ân tam nau kan ndâk pháp luật, mêt uănh gưl prêh, ntrŭnh ăp nau kan khlay bah neh dak. Ƀư ueh nuih n’hâm rgâl mhe, blau mhe, ƀon lan ƀư tơm, tâm rnglăp; ƀư năn ăp nau ntrŭnh bah Đảng, leo nau ntrŭnh bah Đảng lăp tâm nau rêh”.

            Rnôk aơ, Kruanh Quốc hội Trần Thanh Mẫn hŏ ryơk ndrel pă Kỷ niệm chương “Yor nau kan Quốc hội việt nam” pă ân Tổng Bí thư Tô Lâm, Kruanh dak Lương Cường, Thủ tướng Phạm Minh Chính ăp đồng chí rđau kan Đảng, Ngih dak, Chính phủ, Mặt trận Tổ quốc Việt Nam, ndrel rđau kan Quốc hội kŏ pă Kỷ niệm chương “yor nau kan Quốc hội Việt nam” ân ăp ntoh măt Quốc hội ăp gưl./.