Tâm nkuăl n'har bri xã Buôn Đôn, Pôih tahen n’har bri Bo Heng tâm rgop nsum đah Ntŭk kan Cảnh sát cơ động n'gor Dak Lak, rmôt kan tâm kơl bâh ta nkuăl ƀon têh Hồ Chí Minh ndrel Ntŭk kan pâl n'haih Ntung jŭng Buôn Đôn ƀư bôk nau kan "Trung thu tâm rŏng" ta Buôn Trí. Ăp oh kon se dơi râng njroh lân, nău pâl rlưn way ơm, tâm nđŭr njroh mprơ n'hanh dơn 695 nklâm ndơ. Rnâng kan leo ƀư nău kan  hôm nha pă an 150 nklâm ndơ an ăp rnăk vâl geh nău rêh jêr jŏt. Ta n'har bri xã Ia Rvê, Pôih tahen n'har bri Ia Rvê lĕ pă an rlău 1.300 nklâm ndơ an kon hoc bâh mầm non tât trung học cơ sở n'hanh oh kon se ta ntŭk. Ta nkual n'har bri dak lêng phường Xuân Đài, Pôih tahen n'har bri Xuân Đài tâm rgop đah Hội Liên hiệp bu ur phường pă an 200 nklâm ndơ Trung thu. Ăp nklâm ndơ kơl kon se nkual n'har bri geh tay nău răm rhơn tâm rơh Trung thu, mpơl nău hăn ndrel bah cán bộ, tahen Pôih n'har bri n'hanh gưl ủy, n'gâng kan ƀon lan, ăp mpôl leo kan n'hanh nuĭh lŏng nuih n'hâm đah ăp rnăk hôm jêr jŏt.