Tâm nar tâm mâp, rmôt kan ntoh măt Quốc hội n’gor Lâm Đồng mbơh ma cử tri ăp nau nchrăp mpeh mông kan, nkô̆ nau bah rơh rƀŭn tal 10, Quốc hội gưl XV. Tâm nar rƀŭn nchrăp ƀư ntơm lơ 20/10 tât lơ 12/12 Quốc hội mra uănh, ntrŭnh âk nkô̆ nau 43 nau nchrăp luật, nau ntrŭnh tâm nau kan ndâk njêng pháp luật; 2 rmôt nkô̆ nau kan mpeh văng sa, rêh jêng, tơm prăk ngih dak, uănh ăp nau kan geh tât nkô̆ nau khlay êng; nkre lah, geh 3 rmôt nkô̆ nau ăp ntŭk kan njoăl tât gay ntoh măt Quốc hội mĭn ƀư.

Cử tri Lâm Đồng ntoh nau rnơm tâm nau rđau kan bah Đảng, nau mêt uănh bah Quốc hội, nau rđau kan ngăn bah Chính phủ tâm nau kan hun hao văng sa, rêh jêng, đăp mpăn neh dak; kơp dơn ăp nau nsôih rlet nau jêr bah n’gor ân geh nau dơi hun hao văng sa 9 khay bôk năm 6,8% ndrel nau geh tơm prăk soay geh bơi tât 23.60 rmen, tâm ban ma 84% nau nchrăp bah n’gor, hun hao rlau 19% rđil rơh aơ; rnê prêh Bôk nau kan jut ngih truh sat ndrel nau kan mô sŏk prăk lăp nti bah kon se nti bah Đảng, Ngih dak.

Uănh khlay tât nau kan ntĭm nti, cử tri n’gor Lâm Đồng ân lah, ân geh uănh mô dơi mât nau ƀư rơh thi tốt nghiệp THPT yor âk ngăn ăp n’gor ăp năm kŏ geh rnoh tốt nghiệp prêh. Ân geh ƀư ngăch tĭng nau rđau đă bah Bộ Chính trị ân geh uănh ƀư Bôk nau kan ntŭm nti phổ thông, đăp mpăn nau pă du đê̆ ndrôm săm ƀŭt nti ân geh tâm ban tâm lam dak; nkah njrăng nau n’huch mô ân kon se nti geh dŏng điện thoại tâm ngih săm ƀŭt; nau kan âk ngăn kon se nti dŏng điện thoại tâm ngih săm ƀŭt; nau kan âk kon se tâm du jrâu tâm nkuăl Đà Lạt; ndrel nau kan ntĭm nti tâm ăp ngih săm ƀŭt ân geh n’hai nau kơl an tât nau kan ntĭm nti nau gĭt nau ân kon se nti…

Cử tri tâm ăp xã nkuăl jru, nkuăl ngai tâm n’gor đă geh kơl an ntuh kơl nkra ƀư gung trong gay ma nơih tâm nau rƀŭn rgum ndrel ntrŭt dăng nau kan tăch rgâl. Đah ăp nau kan ƀư n;gâng kan tâm nkuăl 2 gưl, cử tri Lâm Đồng lah rjăp, jêh bơi tât 3 khay dŏng kan, ăp nkuăl hŏ ntrŭnh ƀư tâm ban âk nau tă dơi geh khlay bôk năp ƀư ueh nau kơl an ƀon lan. Yơn lah, tĭng cử tri Lê Văn Thái, tâm Phường Lâm Viên, Đà Lạt, hôm du đê̆ nau nkol, nau ê dơi ân geh năn tâm ntrong kan hŏ geh ntrŭnh nau tâm ban geh âk nau dơi kơl an ƀon lan ueh lơn. Yơn lah, tĭng cử tri Lê Văn Thái, tâm Phường Lâm Viên, Đà Lạt, hôm du đê̆ nau kan ân geh rklaih ân năn gay ntrong kan geh ƀư ân nâp ueh:

“Nau kan pă cán bộ, công chức kơt rnôk aơ ê geh tâm ban tâm di ma nau geh âk bah rnoh nŭih ƀư jêng nau jâk lơn tâm nau kan prêh. Cán bộ, công chức ân geh rklaih ăp nau kan têh yor nê khuch tât nau nâp nau kan geh jao ndrel khuch tât nau nâp tam bah nau kan kơl an ƀon lan. Đă ăp ntoh măt Quốc hội, đah Chính phủ ăp n’gâng kan, ntŭk kan geh tât ơm mĭn rvê, rđau đă gay geh nau kan pă ntop biên chế gay cán bộ công chức gưl xã tĭng nau dơi rnoh nŭih, rnoh neh ndrel nau geh dơi bah ăp nkuăl".

Ta nar tâm mâp ma cử tri, wa Y Thanh Hà Niê Kđăm, Uỷ viên Trung ương Đảng, Bí thư N’gor ủy, Kruanh rmôt kan ntoh măt Quốc hội n’gor Lâm Đồng kơp dơn 16 nau đă ŭch ngăn bah cử tri đah nau hun hao bah n’gor. Ngăn lah tâm rnôk nkoch bri âk nŭih, nau dăng dơi têh bah n’gor Lâm Đồng mhe jêh rnôk geh rnglăp ma 3 n’gor Dak Nông, Bình Thuận ndrel Lâm Đồng. Ntoh măt rmôt kan ntoh măt Quốc hội, UBND n’gor Lâm Đồng ndrel ăp ntŭk kan, n’gâng kan bah n’gor kŏ mbơh rkaih du đê̆ nau đă ngăn bah cử tri tâm nau kan bah n’gâng kan ndrel ntŭk kan mât ƀư./.