Phường Tiến Thành, n’gor Lâm Đồng tâm rgop đah ăp nuĭh ntuh kơl n’hanh ăp nuĭh lŏng nuih n’hâm ƀư bôk nău kan “Măngbŏng khay” an ăp oh kon se jê̆ geh nău rêh jêr jot ta ntŭk. Tâm rơh ƀư bôk nău kan, ăp oh kon se jê̆ lĕ geh uănh njroh lân ntơm, geh uănh ăp nău njroh mprơ yor ăp băl jê̆  kon hoc njroh mprơ n’hanh djăt nău nkoch ntơm geh kônh Cuội - yuh Hằng Nga. Di rơh aơ, ndơn kan nuĭh leo kan phường Tiến Thành n’hanh ăp ntŭk  ntuh kơl lĕ pă an rlău 1.550 nklâm ndơ, lĕ rnoh khlăy rlău 125 rkeh prăk an ăp oh kon se geh nău rêh jêr jŏt rhơn Tết trung thu. Ta ngih nti Tiểu học Phan Thanh 2 ntŭk kan 2, xã Hồng Thái, n’gor Lâm Đồng, ndơn kan Mũi Né Bay Resort le pă an 100 nklâm ndơ trung thu n’hanh 20 nklâm bảo hiểm y tế an ăp oh kon hoc rnoi đê̆ geh nău rêh jêr jŏt. Ăp nklâm ndơ aơ lah rnoh kơl ngăch ndăn, n’hao nău gơih nti bâh ăp oh tâm năm nti mhe.

N’gor đoàn, N’gâng kan dak si n’gor Quảng Ngãi ndrel du đêt ntŭk kan mhe tâm rgop ƀư bôk nău “Răm Tết Trung thu 2025” ta Quảng trường 16/3, phường Kon Tum. Rlău 130 kon se bah phường Kon Tum n’hanh Ntŭk kan nău ƀư Kon se rchong Diên Hồng râng njroh mprơ, djôt tât âk nău mprơ n’gŭr răm, geh âk Mông nar Tết Trung thu. Ăp nău mprơ rnê rhơn Wa Hồ, nău rŏng rnăk wâl ndrel ăp nău chĭng xoang djôt nău uĕh văn hóa ta ntŭk jêng mông nar răm m’ak, n’gŭr răm. Nău ƀư njroh lân, wơt ŭnh đèn n’hanh lơn lah rup gui “Nău nkoch khay” lah nău uĕh, wăch rgum rhơn răm, gơih nđơr bah kon se n’hanh nuĭh ƀon lan nkual nklang bah lơ n’gor. Đah bôk nău “Lồng đèn thắp sáng ước mơ”, bôk nău ƀư lĕ rgŏ jă rlău 800 rkeh prăk bah ăp ngih pah kan, ntŭk kan, doanh nghiệp an 1.800 nklâm ndơ Trung thu n’hanh 300 nklâm prăk kơl hăn nti an kon se rlet rlău jêr jŏt, nti blău ta lam n’gor.