Tâm nklang mir cà phê hvi 8 sào dôl tâm rnôk dơi klih,  tâm ƀon Ia Gri, xã Biển Hồ, n’gor Gia Lai, ngih mhe bah rnăk nô Dim ntoh ueh lơn ma tôl, ma găch ndrel mpông nhôm nâp ueh. Nô Dim rhơn mbơh, nau rklaih ach o bah rnăk nô mhe ntơm năm 2021, rnôk manh geh 80 rkeh prăk gay tăm 900 tơm cà phê. Cà phê ndop mhe ntil cao sản, ri tât năm 2023 nô mơ geh klih năm bôk năp. Năm 2024 ntơm geh klih âk, rnoh cà phê hao khlay tât rlau ma rhiăng rkeh tâm du tấn, ri ma nau geh âk, hŏ dơi geh ndâk ngih. Uănh mir cà phê âk play, rnoh cà phê hôm prehe, nô Dim, nkoch:

‘Năm tât geh klih cà phê mra hao ntơm 200-250 rkeh. Rnôk klih drel tăch trok rnon tâm năm tât, nau ŭch ngăn bah rnăk hên lah lŏ geh manh tay prăk geh âk lơn, ntơm 100-150 rkeh. Prăk aơ gâp rvăt phân poh ân tơm cà phê, hôm e ri ŭch rvăt ndrôk ndrel be me gay mât rong tay, ân n’hao nau săk geh ân rnăk vâl kŏ kơt lah ndăm sŏk ăch ndrôk, ăch be gay ma poh ân tơm tăm đŏng”.

Mô êng knŭng rnăk nô Dim, ma âk rnăl vâl jêr jŏt êng êng tâm ƀon Ia Gri, xã Biển Hồ kŏ geh manh prăk ngân hàng chính sách xã hội. Nô A Yiŭ (rnoi jrai) manh 80 rkeh tâm năm 2022, tât rnôk aơ hŏ geh prăk gay ndâk ngih mhe. Nô A Yiŭ mbơh:

‘Gâp manh prăk gay ma tăm cà phê, rnôk klih nơm nơm tăch dŏng gay ma rvăt tay ndrôk rong. Rnôk aơ ndrôk deh geh 3 kon, rnoh dĭng lĕ5 mlâm, rnoh prăk kŏ  rlau 100 rkeh. Hôm cà phê bah rnăk vâl ăp năm kŏ geh tăm 1000 tơm, neh du ha, ăp năm geh rlau 2 tấn rnglay. Rnoh geh bah rnăk vâl du năm geh ntơm 280-300 rkeh. Rnăk hên hŏ rklaih ach o, dĭng lĕ nê rnơm tâm prăk manh tă bah Ngân hàng chính sách xã hội lĕ”.

Xã Biển Hồ jêh rnôk tâm rnglăp geh bơi tât 49.900 nŭih, đah 10 rbăn rnăk, tâm nê rlau 49% lah rnoi mpôl đê̆. Xã rnôk aơ hôm 216 rnăk ach o ndrel 805 rnăk êp ach o, geh 8,7%. Wa Đặng Khánh Toàn, Groi Kruanh UBND xã mbơh, tơm prăk kơl an manh lah mâng dră kơl ăp rnăk rklaih ach o. Rnơm dŏng prăk tam tâm nau mât rong, tuch tăm, ăp năm âk jêt rnăk rklaih ach o, geh ngih vâl, dơi rong kon hăn nti. Nô Đặng Khánh Toàn lah rjăp, lah n’hao tơm prăk aơ, nau n’huch ach o tâm xã ngăn mra geh dơi ngăch nkô̆ nau nchrăp luh:

“Tâm năm aơ UBND n’gor jao ân UBND xã Biển Hồ ân n’huch 69 rnăk ach o. Êp ăp nau kơl an êng ân xã mpeh huch ach o, ri hên kŏ đă Jrâu ân manh prăk Ngân hàng chính sách xã hội ntŭk kan tâm Pleiku n’hao ăp nau kơl an ân manh tâm xã gay xã ƀư dơi ndrel rlet ăp nau nchrăp bah n’gor jao tâm năm 2025 ndrel ăp năm ba kơi tay”.

Kơp tât rnôk aơ, rnoh ân manh tâm rnoi mpôl đê̆ ta Gia Lai geh 2.763 rmen, đah 63.219 năch, geh 24,5% rnoh năch manh prăk tâm Ngân hàng chính sách xã hội n’gor. Đah ăp nau ân manh mro tâm dăch ma huch ach o bah Chính phủ, tâm di ma nau ngăn ndrel tŏng dơi nau ŭch bah ƀon lan tâm xã.  Wa Huỳnh Thị Trà Quế, Giám đốc Jrâu kan ân manh Ngân hàng Chính sách Xã hội ntŭk kan ta Pleiku, nkoch gay nau kan geh dơi tam ngăn ndrel dŏng prăk tâm di, ngân hàng tâm rgop ma xã ndrel ntŭk ân manh gay ƀư nau kan ngăn kơl an kônh wa. Wa Huỳnh Thị Trà Quế, ngơi:

‘Lor ma manh prăk, tâm ăp thôn, ƀon mô lah Tổ dân phố ri ngân hàng tâm rgop nsum ma n’gâng kan tâm xã ndâk njêng rmôt ân manh prăk. Jêh nê, bôk năp ân geh săch nŭih geh manh ndrel jêh nê mơ an manh. Jêh manh, ăp nŭih tâm rmôt, ntŭk ân manh n’hao nau kan mêt uănh, gay ƀon lan dŏng prăk ân tâm di, săl tam tâm nau mât rong, tuch tăm hao rklaih ach o”.

Manh prăk kơl an nau huch ach o ntơm bah âk jêt năm ma aơ ndrel rnoh prăk manh nar lơn âk, tŏng dơi nau ŭch hun hao tâm ăp nkuăl jêr. Lăp tâm năm 2025-2030, ăp n’gor geh dơi nkô̆ mô hôm rnăk ach o, ri ma năn rnoh ân manh tâm di gay ƀon lan mra dơi ƀư mhe tay nau kan tuch tăm, n’hao nau săk tam văng sa, mra geh nau khlay bah nau dră hao. Nŭih geh manh tâm nkuăl jru, ngai, nkuăl rnoi mpôl đê̆ tâm n’gor Gia Lai, aơ lah nau ndră mô dơi mô geh tâm  rklaih ach o, hao ƀư sâm geh./.