Kêng măng 30/9, wa Nguyễn Văn Nên, Rnâng kan Tiểu ban Văn kiện Đại hội Đảng tal XIV, ndrel rmôt hăn kan hŏ tât khâl, pă nklâm ndơ tâm ntŭk kan kơl an nau rêh ndrel kon se n’gor Dak Lak. Rnôk aơ, rmôt kan aơ dôl mât, chăm ân 350 nŭih, geh bu ranh, nŭih rven rvo jâk, nŭih khuch mpeh bôk rngok, kon se geh nau rêh jêr jŏt ndrel nŭih mât rong hăn tât kơl an. Ntŭk aơ geh pă ăp ntŭk jrâu ƀư ăp nau kan, nau gŭ ân tâm di ma nŭih, kơt jrâu ndâk săk soan, tach chưng play, ntŭk pâl cầu lông...nkre đăp mpăn ăp nau kơl an ân ăp nŭih, dak si, ntĭm nti, pâl rlưn.

Tât ôp khâl, bonh đă ăp nŭih geh mât rong ta aơ, wa Nguyễn Văn Nên rnê ăp nau nsôih bah rmôt cán bộ, nŭih kan tâm nau mât chăm nau rêh drăp ndơ, nuih n’hâm ân ăp nŭih geh kơl an.  Wa kŏ kơp dơn ăp nau đă bah rmôt kan, đă rđau kan n’gor kơl an rklaih nau kan geh tât nau dơi, gay n’hao nau nâp kan bah ntŭk kan, rgop ueh lơn tay nau mât ân drăp ndơ nuih n’hâm ân ăp nŭih dôl geh mât, chăm ta aơ./.