VOV4.M’nông – Ntơm ƀư ôi 7/7, ta nkual ƀon têh Kon Tum n’hanh ƀư tâm 2 nar, rơh rƀŭn tal 3, HĐND n’gor Kon Tum khóa 12 đah âk nău duh ndal dơi ƀon lan tâm n’gor uănh dơi ăp nuĭh ntoh măt rgum nchră, ôp n’hanh ntrŭnh ăp nău mpeh dơi mkra. Mbơh nu nău wăng sa-rêh jêng 6 khay bôk năm bah UBND n’gor Kon Tum ta rơh rƀŭn an saơ, bôl dĭng lĕ ndơ geh ta n’gor hao 9,69%, âk lơn rnoh hao jêng ndrel rơh aơ năm bah năp, yơn âk rnoh an ƀư lŏ mô dơi geh nkôp đah nău ŭch... Ndrel đah nĕ âk nău nkân mô hŏ dơi mkra ngăch lah nău nking n’gang bah hun hao, kơt: nkra njêng lŏ mir săk rnglăy đêt; nuh srê geh ta sâm Ngọc Linh ƀư khuch têh an ăp rnăk; jêh nkra rgâl hành chính, rgâl ntŭk ntô ntuh kơl, tăch rgâl, n’hao dơi tâm rlong bah n’gor hôm e đêt... Tâm ntoh ngơi ta ntơm rƀŭn, wa Dương Văn Trang, Ủy viên Trung ương Đảng, Bí thư N’gor ủy, Kruanh HĐND n’gor Kon Tum đă ăp nuĭh ntoh măt rgum mĭn, dăn đă trong mkra mô an geh nău mô lôch, mô jêng hôm e jŏ jong.

Ăp nuĭh ntoh măt râng rơh rƀŭn tal 3, HĐND n’gor Kon Tum khóa 12.

Ta rơh rƀŭn tal 3, HĐND n’gor Kon Tum khóa 12, nuĭh ƀon lan n’gor Kon Tum mpŏng kâp n’gâng kan ƀon lan, ăp nău kan mbra geh nău ơh tâm di đah âk nău ndal, nău lư, nău ji nuih ta rơh ôp-ơh nău ôp, kơt: nu nău n’gơ neh ta nkuăl Kon Plông; nu nău mô tŏng neh gŭ, neh tuch tăm bah nuĭh ƀon lan pĭch rlâm; bảo hiểm y tế geh dun trok, an trok, sŏk lơi; nu nău nai dak si dăn trơn ntŭk kan mô lah ntlơi kan.../.

Nŭih blang: Y Sưng Phê Ja