Ôi 11/10, ta nkuâl Bảo Lâm, n’gor Lâm Đồng, Ban Tuyên giáo Trung ương hŏ ƀư tâm nchră Nuĭh kan mbơh nău lư Trung ương lam dak khay 10 năm 2024. Bơi 300 nuĭh ntơh măt lah kruanh rđău kan ăp n’gâng kan, jrô kan nsŏng kơl tâm trong pah kan nkoch trêng ma mbơh mpeh Ban Tuyên giáo ăp tỉnh ủy, thành ủy, đảng ủy mpeh trung ương, ăp mpôl kan chính trị rêh jêng kon nuĭh, rmôt nuĭh kan mbơh nău lư ăp gưl tâm lam dak tât râng.

Tâm nchră rong an âk mông nar mbơh nău lư way nkô̆ mpeh nô nău ASEAN, lôch jêh du đêt nău kan tâm boh dak bah dih khlay bah kruanh rđău kan Đảng, Ngih dak n’hanh ăp trong rƀŏng têh bah pah kan tâm boh dak bah dih tâm let năp tay. Wa Phan Xuân Thuỷ, Groi kruanh Ban Tuyên giáo Trung ương dăn đă let năp tay, ăp Ban Tuyên giáo ăp tỉnh ủy, thành ủy, đảng ủy ndrel ăp nuĭh mbơh nău lư rgum nkoch trêng jru hvi tâm cán bộ, đảng viên n’hanh ăp rơh kơn ƀon  lan mpeh ăp nău dơi geh nkô̆ khlay đah nău hun hao bah neh dak; njrăng đă pah kan nkoch trêng nău ntrŭnh mbrô 35 nar 14/6/2024 bah Bộ Chính trị mpeh Đại hội đảng bộ ăp gưl hăn tât Đại hội đại biểu lam dak tâl XIV bah Đảng ân dơi rdâk njêng trong nchrăp ăp dăp gay nkoch trêng, lơn lah nău sŏk nău rgop bah cán bộ, đảng viên n’hanh ƀon lan mpeh trong nchrăp lor siƀŭt hao rblang dăn đại hội.