Tâm jrâu nti Tiếng Anh, tâm Ntŭk mât chăm kon se rven Vi Nhân, hôm ntơ lah “Ngih săm ƀŭt Vi Nhân”, tâm nkuăl ƀon têh Buôn Ma Thuột, n’gor Dak Lak, 6 kon se gŭ êp ma nai ntĭm. Dŏng điện thoại ndrel loa kon jê̆, nai ndrel kon se nti ndrel nti nau ngơi Anh bah ăp nau mprơ.

Hôm tâm jrâu nti nhạc êp nê, nai dôl ntĭm ân 2 kon se pâl đơn. Jrâu êp nê, 4 kon se dôl nti play săm ƀŭt Braille. Nai ntĭm Lê Thị Kim Cúc nkoch: jrâu nti geh âk kon se, tâm ăp năm êng êng, nau gĭt ndrel blau nti kŏ mô geh tâm kơt. Ăp nai ntĭm knŭng dơi ntĭm tĭng rmôt, nsing tâm nau blau, djăt, gĭt bah ăp kon se:

 ‘Mhe lăp ri kon se mô geh nau gĭt ôh, tal bôk năp lah ăp kon se mô saơ uănh, geh ăp kon se rnoi mpôl đê̆ mô blau nau ngơi Yuăn. Ăp oh măt saơ ri hŏ jêr hôm, yơn ma kon se ngo măt ri lơn ma jêr. Ăp nau kan bah nơm kŏ ntĭm lĕ, ntĭm play săm ƀŭt. Gâp nti ân kon se gĭt, ăp oh nti tât lôch ndrel geh nau kan đŏng. Gâp saơ ăp kon se kŏ kơt lah ăp kon se ueh êng đŏng, yơn mô geh nau êng ôh. Nơm mĭn ntŭk ntĭm nti ri geh nau tâm dăch ueh ta nê ri ma ntĭm tât rnôk aơ”.

 Lah ntŭk mât chăm, kơl an kon se geh nau khuch, ngihs ăm ƀŭt nti Vi Nhân rnôk aơ geh rlau 200 kon se, ntơm 2 năm tât 20 năm, ăp nau khuch kơt lah, tĕk tôr, chieh măt, mô ngăch tâm bô rngok...Ăp oh tă bah âk n’gor, nkuăl êng êng, ngăn lah rnoi mpôl đê̆, geh nau rêh jêr jŏt. Đah rlau n’gul rnoh kon se gŭ tâm ngih săm bŭt, ăp nau rêh, nau nti bah kon se geh ăp tu bu ur Phaolo (chroh Thiên chúa, Giáo phận Ban Mê Thuột) ƀư. Tĭng sơ Nguyễn Thị Nhiệm, mât ntŭk kon se gŭ, ăp oh geh ntĭm nti ăp nhoat, ntơm bah nau ôp, nau dăn, nau yŭ yai ndrel lah ueh ndrel blau mât chăm săk nơm, jêh nê mơ tât nau blau tâm ndrôm săm ƀŭt:

 ‘Nơm ngơi ma kon se mô gĭt yơn lah Sơn ân ƀư leo trong lor gay ăp kon se ƀư tĭng kơt kơt nê đŏng. Geh du nau ueh ngăn nê lah nơm ân geh rnê nkhôm ân ăp oh hăn bah năp âk nŭih âk ri ba kơi kon se mra gơih n’ơr lơn. Geh rnôk sơ mô gĭt lĕ nau ăp oh, sơ kŏ ntĭm nti ân ăp oh, đă ăp oh nti ân nơm nau ngơi ma nti. Sơ saơ jêr jŏt ri đê̆, kŏ geh yơn ma Sơ saơ nau rhơn âk lơn”.

Ndrel nti play săm ƀŭt, nti nhạc-vẽ rup, ntŭk ntĭm nti Vi Nhân hôm nti kon se ăp nau kan kơt: Kchoh kho ao, trah ri, tanh bok, in lụa, massage gay ma kơl an tâm nau rêh ân kon se. Bơi tât 30 năm rlau aơ, ntơm bah ngih săm ƀŭt aơ hŏ geh âk ngăn kon se hŏ geh nau blau, geh nau kan, Nô Lê Hoàng Gia Hưng tâm nkuăl têh Buôn Hồ, n’gor Dak Lak, lah nŭih ngo măt, tă geh ntĭm nti ta aơ. Nô mbơh ntơm bah ntŭk aơ nô geh nau nsôih gay ma lôch nti Cao đẳng chuyên ngành âm nhạc, ndrel plŏ ntĭm nhạc ân ăp rơh ba kơi:

 ‘Đah ăp nŭih mô ueh tâm săk, ngăn lah chieh măt, jêr ngăn tâm nau kan ntĭm nti kŏ kơt lah nau rêh, hăn ro. Yơn rnơm nau bonh đă bah rnăk vâl, ngăn lah ăp sơ êp ma nơm. Ăp Sơ kơt lah Me, nŭih nai ntĭm kơl an gay ma nơm rlet ăp nau jêr, kơl nơm ƀư dơi nau ŭch nê lah jêh rnôk lôch nti plŏ sĭt ndrel nar aơ gâp kŏ rhơn ngăn geh kan ndrel ma ăp kon se tâm môn âm nhạc”.

Sơ Bùi Thị Ngọc Liên, ƀư nau kan tâm ntŭk mât kơl an kon se geh nau khuch Vi Nhân mbơh, râng ntĭm nti ndrel mât chăm tâm ngih săm ƀŭt ndrel ăp sơ hôm geh bơi tât 30 nŭih nai nti ndrel nŭih tât kơl an. Lôch bơi tât 30 năm ma aơ, khân păng mro nsôih kơl ân kon se geh nau khuch:

"Ăp Sơ rhơn ngăn rnôk aơ ăp kon se geh nau blau, ngăn lah ăp kon se têh, geh ur, geh sai, geh kon ndrel geh nau rêh đăp mpăn. Jŏ jŏ geh rnôk ri ăp oh plŏ ta aơ, mô knŭng sĭt êng du hê ma leo n’ăp ma ur sai nơm sĭt đŏng. Ăp oh mro uănh ăp Sơ kơt lah nŭih băl mpôl bah nơm, ăp Sơ ŭch ngăn mpeh nau nê. Ntĭm nti mô knŭng lah nơm kơp rnoh âk mô lah ƀư nau lư, ma nau kan lah ân nơm saơ ăp oh jêh aơ lăp tâm nau rêh dơi geh đăp mpăn, têh jêng, dơi rêh êng ndrel lah nŭih ueh dơi ân nau rêh jêng đŏng”.

  Bol ma hôm âk nau jêr, rgănh, nsôih gay ăp nai ntĭm nti bah ngih săm ƀŭt Vi Nhân ntop nau nsôih, tâm dăch dơh nau ma nau kan mât rong kon se, lah ăp nar saơ ăp nŭih kon se nơm nti têh blau lơn, rlet âk nau nkol ndrel dơi rnglăp tâm nau rêh. Ntŭk aơ mô knŭng pơk trong, nau nơih gay kon se geh nau khuch hao dơi tâm nau rêh ma hôm rgop nau ƀư rêng tay ăp nau ueh tâm nau rêh đŏng./.