Ăp nar dja, rnôk măng jŭr ta xã Ea Drăng, n’gor Dak Lak, ăp njăr trong cờ neh dak ndrel chrat ang bah n’gâng điện măt nar njêng luh du muh măt mha êng an âk thôn, ƀon. Ta buôn Lê B, trong jong nklăp 3km ntơm nơh ngo dêl, rngot rngăt aƀaơ hŏ chrat ang ŭnh điện. Bar ding trong, ăp lha cờ nthoi jong tĭng ăp jay. Wa Nhan Ngọc Tấn, Chi hội trưởng Chi hội Ƀon lan kan lŏ mir buôn Lê B an gĭt, nău rgâl dja lah nău dơi bah nău du nuih n’hâm, nsum suan bah ƀon lan.

“Ma nău nkoch trêng rgŏ jă, ri kônh wa ƀon lan tâm ban kơt hội viên tâm ban ŭch da dê. Ntơm bah rnôk trong cờ lăp tâm rĭng grep, khoa học lơn ri rŭp uĕh bah buôn Lê B săk ntơr n’hanh ntơm rdâk tâm nuih n’hâm ăp nuĭh ƀon lan mpôl hên nuih n’hâm rŏng dak”

Mô dơn ƀư trong điện mpoh ang, âk hội viên ƀon lan kan lŏ mir ta xã Ea Drăng hôm mât mbro nău mpôih kuaih srăch uĕh ƀon lan, tăm kao meng trong n’hanh tâm pă ntil bah tơm. Tĭng wa Vũ Thị Thúy Hòa, Kruanh Hội Nông dân xã Ea Drăng, nău khlay lah hŏ rdâk dơi nău khlay nchrăp lor bah nuĭh ƀon lan tâm ăp trong leo nsĭt geh nău dơi ngăn ngăn ma ăp nău kan ngăn ngăn gay tĭng kơn ƀư rgâl muh măt n’hanh nău gĭt mât njrăng êng ntŭk gŭ rêh ta nkual ƀon lan gŭ.

“Mô kâp nơm tay tâm nău ntop kơl bah ngih dak lĕ rngôch ma mpôl hên rgop nsum ma trong rgŏ jă ƀon lan leo ƀư mât njrăng êng njăr trong rsong hăn, njăr trong điện tâm ban kơt tâm pă ntil ndŏk nja bah tơm jay n’hanh tâm pă ntil dak khêh djơh”.

Ta phường Buôn Hồ, n’gor Dak Lak, ăp gưl Hội Nông dân rgŏ jă hội viên rgum ndŏk, rgum rchŏk dak si ndrŭng lôch dŏng, rdâk njêng ăp njăr trong nđĭr – srăch – uĕh n’hanh lơi ir dŏng dak si tâm nău kan tuch tăm đŏng. Mhe aơ, trong leo "Chi hội nông dân mât njrăng êng mpeh ntŭk gŭ rêh" dơi an ƀư ta buôn Tring 1 n’hanh buôn Tring 2, dơn geh nău n’grŏ tĭng uĕh bah nuĭh ƀon lan. Wa Y Tích Mlô, ta buôn Tring 2, phường Buôn Hồ an gĭt:

“Mpôl hên dŭt rhơn n’hanh lah uĕh nău uănh khlay bah Hội Nông dân hŏ ntop kơl thŭng ndŏk n’hanh điện măt nar mpoh ang tâm măng. Mpôl hên mbra ndrôih rgum kuaih kloh uĕh n’hanh nsrôih râng ăp nău kan mât njrăng ntŭk gŭ rêh gay ƀon lan nar lơn ma srăch, uĕh lơn”

Lam n’gor Dak Lak aƀaơ mât trong leo 187 ntŭk ƀon lan kan lŏ mir mât njrăng ntŭk gŭ rêh nkre đah rdâk njêng ƀon lan mhe. Âk ntŭk hŏ jêng ăp njăr trong chat ang - nđĭr - srăch - uĕh, pơk hvi trong leo tâm pă ndŏk bah tơm, rgum ndŏk nja ndơ tuch tăm n’hanh dŏng chế phẩm sinh học tâm nău kan tuch tăm. Wa Ya Toan Ênuôl, Kruanh Hội Nông dân n’gor Dak Lak an gĭt, nău ŭch bah ăp trong leo ƀư mô dơn lah rgâl rup uĕh ƀon lan ma hôm rdâk njêng ăp nsum mpôl ƀon lan gŭ srăch uĕh, jŏ jong, tâm nê nuĭh ƀon lan mât nău khlay ƀư rgum tơm.

“Hội way ntrŏng kloh rdâk njêng ƀon lan mhe ri ƀon lan kan lŏ mir ân lah tơm mpôl, hôm hội lah mpôl kan rgum tơm gay leo ƀư têk ndrêng n’hanh buăt nthoi. Leo ƀư jêng nău kan ngăn ngăn, tâm pă kloh nuĭh dơn kan, kloh nău kan rgum tơm ndơ mpôl, nkre rdâk njêng ƀon lan mhe đah n’hao săk geh nău rêh nuĭh ƀon lan”.

Ta ăp ƀon lan bah Dak Lak nar aơ, nău rgâl mô dơn ta ăp njăr trong chrat ang lơn mô lah kloh uĕh lơn, ma hôm mpơl kloh ma nău kan nuĭh ƀon lan lor nchrăp nsum ti mât uĕh ntŭk he gŭ rêh. Ntơm bah tuch tăm, gŭ rêh, khân păng hŏ gĭt êng lơn tâm nău mât njrăng ntŭk gŭ rêh bah he, rgop ƀư mhe muh măt ƀon lan nar lơn ma nđĭr uĕh, srăch se lơn.