VOV4.M’nông: Kêng măng 8/7, rlau 20.400 kon se thi tâm hội đồng thi Dak Lak lôch môn thi dăch dŭt, hŏ jêh rơh thi THPT năm 2022. Rơh thi geh ân lah đăp mpăn, rjăp, tâm ban ndrel geh nau dơi nkô̆ ma n’gâng kan ntĭm nti nchrăp luh. Mbơh ngăch jêh lôch rơh thi, wa Phạm Đăng Khoa, Giám đốc N’gâng kan ntĭm nti n’gor Dak Lak, Groi Kruanh Rnâng kan rđau gưl n’gor rơh thi tốt nghiệp THPT năm 2022 ta Dak Lak mbơh:

Năm aơ, đah nau lăp kan ueh bah lam ntrong kan chính trị, ăp gưl kan rmôt kan hŏ ƀư ueh nau kan, nkre đăp mpăn rnă njrăng, nkre năn nâp nâp mpeh droh ndơ, nuih n’hâm kơl an kon se ndrel me mbŏ kon se geh đăp mpăn râng thi. Rnoh kon se râng thi môn geh 99,55% hao gŏ lơ. Đề thi geh âk kon se mbơh lah tâm ban ma n’hâm, geh nau dơi prêh. Yơn lah, nau rngot lah hôm 3 kon se ƀư tih nau tih yor leo điện thoại di động lăp tâm jrâu thi./.

Nŭih rblang: H’Thi