VOV4.M’nông – Măng 10/7, ta Ngih Văn hóa n’gor Dak Lak, Hội từ tâm Dak Lak tâm rgop đah N’gâng kan Văn hóa-Thể thao n’hanh Pâl nđaih Dak Lak ƀư măng nhạc kơl an Nău uĕh bah play nuih. Bah nĕ ƀư prăk nkrem geh rlău 660 rkeh prăk kơl an ăp nău kơl ntĭm re dak an dơm n’hanh mât uĕh nău kan cheh tanh way ơm ta n’gor. Ta bôk nău kan hôm geh nău ƀư an 2 ndrôm jâng tanh yor nuĭh mĭn njêng văn hóa La Quốc Bảo ê nkra êng an nău ƀư kơl nuĭh bah Hội từ tâm Dak Lak.

Mpôl rdâk ƀư an sam bŭt kơp dơn an ăp nuĭh, rmôt kan kơl an bôk nău kan.

Ntô jôt aơ dơi tăch ƀư prăk nkrem gay pah kan. Mpôl rdâk ƀư lĕ wơt dơn geh rlău 660 rkeh prăk bah ăp nuĭh, ntŭk kan, rmôt kan kơl bôk nău kan. Lĕ rngôch prăk dơi ntuh kơl an nău kan ntĭm re dak an kon se n’hanh ndâk ƀư jay nhih Êđê ƀư ntŭk cheh tanh n’hanh nkoch mbơh ndơ thủ công mỹ nghệ an rmôt bu ur cheh tanh ta xă Dray Bhăng, nkuăl Cư Kuin.

Nŭih blang: Y Sưng Phê Ja