VOV4.M’nông: Tâm khay 6 n’hanh khay 7 mhe rlău, công ty điện ưcj Dak Lak lĕ ƀư lôch uĕh bôk nău kan nkoch trêng đăp mpăn điện tât nuĭh bên bah cán bộ phung pah kan, nuĭh kan ta 16 điện lực n’hanh ăp rmôt nkra njêng. Nău kan aơ gay rêng hvi n’hanh n’hao nău wât mpeh đăp mpăn điện tâm pah kan nkra njêng.

Aơ lah rơh bôk năp Dak Lak ƀư bôk nău kan nkoch trêng đăp mpăn điện tât nuĭh ƀon lan bah cán bộ phung pah kan, nuĭh kan tâm n’gor. Tĭng nĕ, ndrel đah nău pơk ăp nău nkoch tâm tivi “SOS-đăp mpăn gay sĭt tâm jay”, ăp rup nkoch trêng ta ntŭk, kruanh Công ty điện lực Dak Lak geh nkoch bri đêp rmên, djăt n’hanh ơh ăp nău ôp đah nuĭh ƀon lan bah ăp cán bộ phung pah kan. Bôk nău kan lĕ dơi geh nău kơl dŭt n’hâm, kơl rêng hvi n’hanh n’hao nău wât mpeh đăp mpăn pah kan đah ăp rnăk. Yuh Trần Thị Hiền, ur nô Nguyễn Xuân Bắc, nuĭh pah kan điện lực Dak Lak, an gĭt:

“Tă bah nar nkoch trêng aơ kơl an gâp wât lơn mpeh nău kan bah sai. Ri rnăk wâl dơi ntop kơl an sai mpeh pah kan nău mĭn, nta an nuih n’hâm an saơ gâp hăn kan uĕh lơn, gay sai rgum pah kan du trong đăp mpăn lơn”.

Du nar nkoch trêng an nuĭh rnăk wâl nău kan điện.

Hôm yuh Lê Thị Mỹ Hạnh, ur sai Đàm Thanh Cao, phung pah kan Điện lực mpeh bah dâng Buôn Ma Thuột, an gĭt:

“Gâp dơi wât nkô̆ nău kan ma nuĭh rnăk wâl gâp dôl kan, lơn lah nău kan đăp mpăn tâm nău kan điện an tŏng ăp nău way m’hâm ƀư. Ri gâp geh nău wât gay ntop kơl sai, ma gâp hôm dơi nkoch trêng an ăp nuĭh bên êng dơi wât nău nĕ”.

Wa Trần Tấn Phùng, Kruanh Công đoàn, Groi Giám đốc Công ty điện lực Dak Lak, an gĭt, tă bah bôk nău kan aơ, công ty mpŏng ăp nuĭh bên bah nuĭh kan điện jêng ăp nău nkoch trêng dŭt n’hâm, nkah ntĭnh ăp nar mpeh ăp nău klach tâm rnôk pah kan. Nkre công ty đă ăp ntŭk kan ndâk ƀư ăp rmôt zalo đah tât râng bah nuĭh bên gay ăp nuĭh dơi nkoch nar pah kan, dăn đă ăp nău rgop n’hanh ndrel lăp tâm nău n’hao đăp mpăn pah kan.

Phung pah kan nău kan điện nsrưng mro đah nău klach rnêk pah kan.

Nău kan geh êng bah nău kan điện lah geh nău mâp ri mbra an ƀư ndal n’ăp măng nar, ri dŭt mpŏng nuĭh bên tâm pă. Tal 2 lah gay đăp mpăn tâm trong kan nău kan điện ri geh dŭt âk nkô̆ nău, tâm nĕ geh nkô̆ nău mĭn âk ir. Ri công ty ŭch nkoch trêng tât nuĭh ƀon lan nuĭh bên tâm pă ăp nău nĕ tâm nău kan rnăk wâl gay nuĭh pah kan mô geh  rvê rnôk gŭ ntŭk pah kan ri nău kan mbra đăp mpăn lơn”.

Dơi gĭt jêh bôk nău kan aơ, PC Dak Lak mbra uănh lah, rhoăt tay nău blău ơm gay ndâk njêng nkô̆ nău dăch dêh, uĕh lơn an ăp rơh nkoch trêng bah kơi tay n’hanh nău ŭch n’glêh dŭt lah đăp mpăn lĕ rngôch rnôk pah kan.

Nuĭh rblang: Y Sưng Phê Ja