Tâm nchră hŏ dơn 101 nău dăn đă bah doanh nghiệp, hợp tác xã n’hanh rnăk tăch rgâl, rgum tâm ăp trong rgâl uĕh ntŭk ntuh kơl, droh rklaih jêr jŏt an ƀư njêng tăch rgâl n’hanh hun hao wăng sa êng bah dih ngih dak. Ăp nău dăn đă ƀư ăp tŏng tay trong tĭng, dơh glêh siƀŭt, droh rklaih ăp wăk kol mpeh neh ntu, dăp rgum, ntuh kơl, rdâk njêng n’hanh ntŭk gŭ rêh; nkre n’hao tât âk đah tơm prăk manh, trong kơl sŏk soăy n’hanh ăp tơm ndơ hun hao. Wa Võ Thị Hà Giang, ntơh măt Tập đoàn Cà phê Trung Nguyên, dăn đă:

“Mpôl hên dăn đă Trung ương n’hanh n’gor gŭ mĭn tay trong kơl mha êng an n’gor Dak Lak nsing tâm 5 n’gâng tơm: mpeh trong kơl ngih dak, mpeh ntŭk ntô ndơ dŏng, mpeh tơm nuĭh kan, mpeh prăk kaih n’hanh khoa học công nghệ.”

Mpôl doanh nghiệp dăn đă ntrôl ngăch ntuh kơl ntung trong, logistics, ndơ dŏng mbrô; ntop kơl ntrŭt ntrôl ngăch tăch rgâl, hun hao tăch rgâl điện tử, pâl nđaih n’hanh wăch rgum ntuh kơl. Âk nău rgop dăn đă n’hao dŏng âk khoa học công nghệ, rgâl mbrô, tâm pă nău lư rhŏ dŏng an ƀư njêng tăch rgâl; ngăch nkra ăp jêr jŏt, wăk kol ntoh luh tâm rnôk lăp kan. Wa Trần Khánh Minh, ntơh măt Hiệp hội pâl nđaih n’gor Dak Lak mpơl nău rgop:

“Dŭt jêr bah doanh nghiệp aƀaơ, mpôl hên ŭch ƀư pâl nđaih nđĭr uĕh, ƀư ăp dăp yơn mô gĭt mhâm ƀư lah di rnoh. Tă bah mô geh du mâng weh tâm di kloh rvah, ăp nhih pah kan mât uănh ta ntŭk wĭ wĕ tâm nău an siƀŭt mât dŏng neh ntu mô lah rdâk njêng ndơ ntop dŏng ta neh tuch tăm si gle nkre đah pâl nđaih. Doanh nghiệp ƀư ngăn, ƀư lĕ nuih n’hâm ri klach tih. Dăn đă ntrŭt ntrôl n’gluh an dŏng nkôp rnoh di pâl nđaih nđĭr uĕh.”

Ơh ăp nău rgop, nău dăn đă bah mpôl doanh nghiệp, wa Đỗ Hữu Huy, Uỷ viên dự khuyết Trung ương Đảng, Kruanh UBND n’gor Dak Lak an gĭt, n’gor hŏ n’hanh dôl rgum rđău đă lĕ n’hâm  suan ăp trong ntrŭt ntrôl hun hao; njêng Ban rđău đă hun hao bar mbrô n’hanh ăp rmôt pah kan way blău kan gay ndrel hăn, droh rklaih ăp jêr jŏt an doanh nghiệp, nuĭh ntuh kơl. Tĭng wa Đỗ Hữu Huy, n’gor êng uănh khlay rgâl uĕh ntŭk ntuh kơl tăch rgâl, ntrôl ngăch rgâl dơh glêh siƀŭt rƀŏng tât sŏk mpôl doanh nghiệp ƀư rgum tơm rhŏ dŏng.

“UBND n’gor Dak Lak ntrŏng hăn ndrel, djăt n’hanh ntop kơl doanh nghiệp, hợp tác xã, rnăk tăch rgâl lah nău dơn kan way ƀư mbro. Mô dơn lah tĭng ƀư tâm nar tâm nchră, nuih n’hâm rloh rlău bah UBND n’gor lah rgâl dăng bah nău mĭn ƀư ta siƀŭt jêng nău  mĭn rhŏ dŏng n’hanh ndrel hăn mpôl doanh nghiệp.”

N’glôch jêh tâm mâp cử tri đah mpôl doanh nghiệp, hợp tác xã n’hanh rnăk tăch rgâl, wa Lương Nguyễn Minh Triết, Uỷ viên Trung ương Đảng, Bí thư Tỉnh Uỷ, Kruanh mpôl Đại biểu Quốc hội n’gor Dak Lak lah rjăp nău nsrôih chính trị dŭt âk bah n’gor tâm nău droh rklaih jêr jŏt, wăk kol tâm nău ƀư njêng, tăch rgâl du trong ngăn ngăn.

Bí thư Tỉnh uỷ Dak Lak jao nău kan an UBND n’gor n’hao dăng rgâl mhe trong tâm dâl nău, djăt ăp nău rgop, nău dăn đă bah ăp doanh nghiệp. Tâm pă kloh nău dơn kan bah tĭng nuĭh, tĭng ntŭk kan tâm nău nkra bah lĕ, ăp nău dăn đă ngăch dơi njuăl tât. Mpôl Đại biểu quốc hội, HĐND n’gor Dak Lak mbra ƀư ôp uănh groi nđôi ăp nău ton bah UBND n’gor tâm ban kơt ăp n’gâng kan ta n’gor, n’gâng kan ta ntŭk đah mpôl doanh nghiệp đŏng.

“N’gor Dak Lak lah rjăp du tơ̆ tay đŏng, dŭt n’hâm uănh khlay nău kan bah doanh nghiệp lah nsum, lơn lah mpôl wăng sa êng bah dih ngih dak. Aơ lah suan ntrôl dŭt n’hâm khlay gay n’gor tât rnoh hun hao 2 mbrô tâm let năp tay. Mpôl hên ŭch rŏng mpôl doanh nghiệp lor nchrăp joi gĭt tay, tĭng lhăt ăp quy định pháp luật, rgâl mhe nău mĭn tăch rgâl, ndăn dŏng ăp trong kơl lor, ăp trong kơl hŏ nkoch tâm Nghị quyết 68 bah Bộ Chính trị mpeh hun hao wăng sa bah dih ngih dak gay hun hao doanh nghiệp.”

Ntơm bah ăp nău ton ta tâm nchră, Dak Lak dôl mbơh mpơl lor nău lư mpeh du n’gâng kan nta trong dơh, sŏk doanh nghiệp ƀư ntŭk rgum tơm rhŏ dŏng. Nău rgâl mhe trong tâm dâl nău, tâm pă kloh nău dơn kan n’hanh groi nđôi lôch jêh tĭng ƀư mô dơn kơl droh rklaih ăp wăk kol ta năp măt ma hôm njêng nău nsing nơm an mpôl doanh nghiệp. Aơ lah njuat hăn ngăn ngăn gay ndơ̆ nuih n’hâm Nghị quyết 68 bah Bộ Chính trị lăp tâm nău rêh, ƀư nău djăt jêng dâk kan, ƀư ăp nău ton jêng nsĭt geh nău dơi hun hao ngăn ngăn.