Rơh rƀŭn nchră lĕ geh dơn rlău 100 nău dăn đă bâh doanh nghiệp, ntŭk kan ndrel n’hanh rnăk tăch rgâl, rgum ta ăp trong kan rgâl mhe ntŭk ntuh kơl, doh rklaih ăp nău jêr an tăch rgâl n’hanh ntrôl an hun hao wăng sa kan êng. Ăp  nău dăn đă rgum ƀư tay lĕ nău kan, ƀư an dơh ueh nău kan hành chính, doh rklaih ăp nău kŏ văk mpeh neh ntu, nău nchrăp kan, ntuh kơl, rdâk njêng n’hanh ntŭk gŭ rêh, nkre lah n’hao nău dơi geh dŏng manh prăk, nău kơl thuế n’hanh ăp rnoh hun hao. Nglôch lôch rơh rƀŭn nchră, wa Lương Nguyễn Minh Triết, Uỷ viên Trung ương Đảng, Bí thư n’gor uỷ, kruanh mpôl Đại biêủ Quốc hội n’gor Đăk Lăk pă nău kan an UBND n’gor n’hao nău rgâl mhe trong kan tâm nchră, djăt, dơn ăp nău tâm rgop, dăn đă bâh ăp doanh nghiệp. Pă mbơh na nê̆ nău dơn kan bâh ăp nuĭh kan, ntŭk kan tâm nău doh rklaih na nê̆ gay ma ngăch mbơh ƀư ăp nău dăn đă. Mpôl Đại biểu Quốc hội, HĐND n’gor Đăk Lăk lĕ geh ƀư uănh nđôi ăp nău tâm ton kan bâh UBND n’gor tâm ban kơt ăp ntŭk kan n’gâng kan đah ntŭk kan doanh nghiệp.