Rgâl nău ngơi nkoch mbơh nău mhe Ƀư tĭng Nghị quyết 57, năm aơ n'gor Dak Lak nchrăp pă an rlău 1.000 rmen prăk an khoa học công nghệ n'hanh rgâl mhe, nkre nchrăp n'hao tay tâm ăp năm tât. Yơn lah, tât aƀaơ n'gor mhe pă an bơi 30 rmen prăk n'hanh rnoh prăk dja mô hŏ dŏng lĕ đŏng.

Wa Cao Đình Huy, Giám đốc Sở Tài chính, an gĭt Dak Lak mô hŏ tŏng geh tơm ndơ an khoa học, công nghệ n'hanh rgâl blău ƀư mhe. Đah ăp trong ntop kơl dôl dơi kơt dŏng, doanh nghiệp jêt n'hanh dah găp mbra dơi ntop kơl tât 100 rkeh prăk ăp năm. Du đêt nău kan gŭ mĭn khoa học dơi ngân sách ntop kơl bah 50% tât 100% rnoh prăk nuĭh kan, ndơ dŏng n'hanh ndơ ntrŭp dŏng. Yơn lah, ân rdâk njêng dơi ăp nău nchrăp ƀư, dăn đă tŏng ăp na nê̆ gay an ƀư.

Mpeh đah doanh nghiệp, wa Phạm Ngọc Duy Liêm mĭn lah, ntŭk tăch rgâl aƀaơ mô geh mô tŏng phần mềm mô lah ăp trong mkra công nghệ. Yơn lah, doanh nghiệp ân năl dơi moh ndơ he ŭch geh n'hanh moh ndơ dơi mkra đah công nghệ, ntơm bah nê ndơ̆ luh nău đă na nê̆ đah doanh nghiệp công nghệ.  "Ăp doanh nghiệp công nghệ mpôl hên dôl mô tŏng lah nău đă bah mpeh doanh nghiệp, jêng lah he ân tâm ôp bar ding, mô dơn lah doanh nghiệp công nghệ tât mbơh rblang công nghệ ma lah ăp doanh nghiệp mbra ân ndơ̆ luh ăp nău mĭn njêng, ndơ̆ luh ăp jêr jŏt gay doanh nghiệp công nghệ hăn nkra".

Ăp ntoh măt đă, đah nau dơi mpeh tuch tăm, ê nkra ndơ tuch tăm ndrel pâl n'aih, Dak Lak mra ân lor ăp nau kan kơt tuch tăm blau mhe, joi tu tơm, mât nau kan tuch tăm, ê nkra ndrel pâl n'aih blau mhe; ndâk ntŭk ƀư nau kan công nghệ, ntŭk ntŭk kan tăch rgâl ndơ̆ luh nau kan gay ăp ntŭk kan công nghệ rlong ƀư nau kan tâm nklăp 3 tât 6 khay; lah geh nau dơi ri lŏ pơk hvi.

Wa Đỗ Hữu Huy, Kruanh UBND n'gor Dak Lak uănh năl, lơn âk doanh nghiệp ta n'gor lah doanh nghiệp jê̆ n'hanh dŭt jê̆. Tâm rnôk kơt dŏng công nghệ, pe ntŭk kol têh lah tơm prăk ntuh kơl, nuĭh kan ƀĭt joet n'hanh nău mĭn rvê rgâl. Yor nê, gay droh rklaih, n'gor ntrŭt nsôr doanh nghiệp lor nchrăp ntuh kơl tâm công nghệ geh bản quyền, nkre n'hao boăt nthoi đah doanh nghiệp đah n'gâng kan, ngih sam ƀŭt đại học, viện gŭ mĭn n'hanh ăp nuĭh rnâng kan công nghệ.  "Ăp doanh nghiệp ân rgâl mpeh nău mĭn, mpeh trong mât bôk kan, ân rdâk njêng văn hóa rgâl blău ƀư mhe tâm ntŭk kan nơm. Tâl bar lah dăn đă rgum tâm trong kan dơh uĕh bah n'gor, uănh khlay tât trong ƀư tâm rgop "pe jay", doanh nghiệp nchăm rvăt ăp nhih pah kan n'hanh doanh nghiệp ân nchăm rvăt an ăp nhih nti ta n'gor, ăp viện gŭ mĭn n'hanh ăp nuĭh rnâng kan công nghệ tâm n'hanh bah dih n'gor, doanh nghiệp moh ndơ ŭch, nchăm rvăt moh ndơ gay an viện, an sở, mô lah an ăp nhih nti mbra rblang luh nkô̆ nău nê".

 H Xíu/VOV Tây Nguyên