Dak Lak aƀaơ geh nklăp 44.000 ha sầu riêng, tâm nê rlău 33.000 ha dôl an klêh play, rnoh âk geh năm 2026 nchroh nklăp 500.000 tấn. Aơ lah ngoăy tâm ăp ndơ tăch geh rnoh khlay tăch n’gluh dŭt têh bah n’gor, rgop khlay tâm hun hao wăng sa n’hanh nsĭt geh wăng sa bah nuĭh ƀon lan.

Yơn lah, bah năp nău ŭch geh nar lơn ma khăch khoch bah ăp ntŭk rvăt n’glăp mpeh ƀoi tơm luh, uănh năl bu chuh sa n’hanh kah uĕh ndơ sa, mât uănh mã mbrô nkual tăm, mã mbrô ntŭk nklâm tâl ta du đêt ntŭk hôm khoah, rŭ hôch geh ma nău khuch tât nsing nơm n’hanh nău tăch n’gluh.

Ban Thường vụ Tỉnh ủy Dak Lak đă Đảng ủy UBND n’gor dja rđău đă ăp n’gâng kan bah lơ, ăp n’gâng kan tâm dâng ndăn ngăch ra uănh tay lĕ rngôch mã mbrô nkual tăm, mã mbrô ntŭk nklâm tâl hŏ dơi an; ntrôl ngăch nău pă an mhe đah ăp nkual tŏng di; rmal lhăt ăp nău tih tăch rvăt, an manh mã mbrô nkual tăm, mã mbrô ntŭk nklâm tâl n’hanh ăp nău tih rklâm tâm hồ sơ tăch n’gluh.

N’gor Dak Lak mbra rdâk njêng trong tâm n’guăk kan nsum rgop âk n’gâng kan đah nhih pah kan tuch tăm mât rong, công thương, công an, mpông n’har, sŏk soăy n’hanh n’gâng kan ta ntŭk gay tâm ban dơn ngoăy nău  lư, mât kân lhăt rêng mât chăm- rgum rvăt- tăch n’gluh; nkre ntrôl ngăch rgâl mbrô, rdâk njêng ntŭk mât prăp nău lư dŏng nsum an pah kan mât uănh, nkah njrăng lor n’hanh ƀĭt juet.

Tĭng wa Lương Nguyễn Minh Triết, Uỷ viên Trung ương Đảng, Bí thư Tỉnh ủy Dak Lak, âk wăk kol bah n’gâng kan sầu riêng aƀaơ geh tât trong tâm n’guăk kan, trong kơl mpeh nău dơi kan bah Trung ương, lơn lah nău pă mã mbrô nkual tăm, mã mbrô ntŭk nklâm tâl, ƀoi tơm luh n’hanh trong uănh năl kah uĕh. N’gor Dak Lak hŏ rgum ăp nău dăn đă gay Trung ương ơm droh rklaih, der khuch tât trong tăch n’hanh tăch n’gluh tâm khay klêh play năm aơ.

“Dăn đă mpeh ƀư lôch jêh ăp tŏng quy định geh tât ƀoi tơm luh, pă an mã mbrô nkual tăm, mã mbrô nklâm tâl, n’hanh ntrŭt nsôr lam mpôl rgum ƀư jrô uănh năl kah uĕh. Aƀaơ Hiệp hội sầu riêng n’hanh doanh nghiệp sầu riêng lah suan dăng bah n’gor ri dôl dŭt nuih ăl mpeh nău dja. Ri aơ lah nsing tâm trong kơl bah Trung ương đŏng, n’gor gĭt kơt nê đŏng yơn n’gor mô dơi an ƀư nău dja”.

Đah ăp nău rđău đă lĕ nuih n’hâm bah Tỉnh ủy ndrel nău lăp kan ăp kôp bah ăp gưl, ăp n’gâng kan, Dak Lak mpŏng mbra droih rklaih năn ngăch ăp wăk kol, êt lhăt mât uănh rêng mât chăm n’hanh tăch n’gluh sầu riêng. Bah nê, mô dơn mât njrăng săk ntơ lư sầu riêng Dak Lak ta ntŭk tăch dak bah dih, ma hôm rgop mât jâng nsan hun hao jŏ jong an ndơ tăch tơm, đăp mpăn nsĭt geh wăng sa an nuĭh tăm.