Rơh rƀŭn nchră uănh năl njoat hun hao mhe bâh n’gor Đăk Lăk lôch nglăp nsum, nkre lah pơk luh du trong mhe hun hao đah nău mpŏng uănh jŏ jong, njêng nău mhe geh âk rnoh ntuh kơl. Tâm nău nchrăp kan mhe, Đăk Lăk geh nău mpŏng ŭch jêng ntŭk hun hao tơm bâh nkual Duyên hải Nam Trung Bộ n’hanh Tây Nguyên, huhn hao tĭng trong ueh nđir, ueh mhe n’hanh nâp nâl.

Khoa học công nghệ, rgâl mhe nău kan, rgâl mhe rnoh mbrô n’hanh nău wăng sa dak lêng geh n’gor Đăk Lăk uănh năl lah ăp nău nsrôih gay ma hun hao mhe. Ntŭk hun hao mhe geh ƀư tĭng trong kan 3 nkual hun hao, 3 ntrong mper mpeh nău wăng sa n’hanh 2 ntŭk kan tơm khlăy. Tâm nĕ, ta nkual Buôn Ma Thuột geh mât tay nău kan săk tơm khlăy hun hao bâh Tây Nguyên, hôm nkual mpeh luh nar geh mpŏng uănh jêng ntŭk hun hao wăng sa ueh nđir, wăng sa tâm pleh, logistic, ndrâm dak lêng n’hanh nău wăng sa dak lêng, hun hao knơm ta nău wăng sa ueh nđir, wăng sa tâm pleh, rgâl mhe rnoh mbrô n’hanh rgâl mhe mbrô. Nsrôih an nău hun hao GRDP râng geh lvang năm 2026-2030 geh bâh 11%/năm let lơ, tât năm 2030 geh du hê nuĭh rlău 153 rkeh prăk.

Ta rơh tâm nchră, wa Đỗ Hưũ Huy, Kruanh UBND n’gor Đăk Lăk lah na nê̆.

 “Nău ŭch hun hao ngăch, nâp nâl kanŭng geh dơi rnôk ma lĕ trong kan chính trị hăn ndrel đah doanh nghiệp, nuĭh ntuh kơl. Nău ma ăp nuĭh ntoh kơl knơm âk mô dơn lah nău mpŏng hun hao ma lah du n’gâng kan pah kan kloh rjăp, răng dăng n’hanh hăn ndrel. Yor nĕ, ndrel đah nău ƀư lôch nău kan, ntuh kơl ndơ dŏng n’hanh nchrăp an hun hao rnoh neh, Đăk Lăk uănh năl nău rgâl mhe hành chính, rgâl mhe ueh ntuk ntuh kơl tăch rgâl lah nău kan tơm khlăy, geh nău khlăy ngăn, sŏk ƀon lan n’hanh doanh nghiệp ƀư tơm gay ma kơl kan”.

Ta rơh rƀŭn nchră, n’gor Đăk Lăk lĕ geh mbơh rnoh săk ăp trong kan an lor geh âk ntŭk kan tât ntuh kơl, rgum ta tuch tăm công nghệ mhe n’hanh nkret ƀư, công nghiệp nkret ƀư nkra njêng, ŭnh nar mhe njêng, logitic n’hanh ntung trong. UBND n’gor Đăk Lăk lĕ pă nău ntrŭnh ŭch đah nău ntuh kơl an 25 nău nchrăp kan, đah lĕ rnoh prăk ntuh kơl rlău 40.280 rmen prăk. N’gor lĕ geh kí nău tâm ton kahgĭt kan ndrel đah 78 ntŭk kan ntuh kơl, geh lĕ rnoh prăk kan bôk năm rlău 1 rkeh rmen prăk.