VOV4.M’nông:   Đah âk nău ƀư ngăn ngên kơt ntop kơl jay gŭ; dơn mât rong, Mê̆ Việt Nam janh dăng lôch nău rêh, ƀa ƀơ chop khâl ntrŭt nsôr drăp ndơ n’hanh nuih n’hâm... lĕ du gâl bah oi nău rngot njê tâm lơh tâm su, kơl ăp rnăk dơi kơl, nuĭh geh soan đah cách mạng ta Dak Lak geh nău rêh nar lơ uĕh lơn.

          Tâm jay tâm kơl hôm e ƀô sơn mhe, wa Lê Thị Tường Vân ta nkuăl têh Quảng Phú, nkuăl Čư M’gar, n’gor Dak Lak, răm rhơn an gĭt, khay 3 mhe rlău, dơi nkuăl ntop kơl 50 rkeh prăk, kônh wa, mpôl băl, nuĭh đêt, nuĭh âk an manh tay, rnăk wâl lĕ dơi ƀư du mlâm jay mhe. Aƀaơ nuĭh nô koet nte bah wa mbra geh ntŭk gŭ uĕh lơn gay săm ji, ntŭk ƀư brah nuĭh bơ̆ lĕ khĭt tâm rơh tâm lơh mprơh Mỹ têh uĕh lơn:

“Rnăk wâl jêr jŏt đŏng. Ƀư hôm mât nô njê đŏng, knơm ngih dak si kơl dơi ƀư du mlâm jay rhơn đŏng. Dăn lah uĕh Jrô kan tahen sôt rmanh lĕ kơl oh nô”.

Bùi Đức Khương tahen sôt rmanh rhơn yor nău rêh đăp mpăn, ăp kon nti nsơm jêng nuĭh.

Ndrel đah nău ndâk ƀư jay tâm kơl, ăp nău ƀư mât uănh an rnăk dơi kơl, nuĭh geh soan đah cách mạng dơi nkuăl Čư M’gar uănh mĭn ƀư săk rnglăy. Wa Bùi Đức Khương, sôt rmanh hạng 3/4 ta thôn 2B, xă Ea M’nang an gĭt, rlău ma nău trok an di nar ăp nău kơl; Đảng bộ, n’gâng kan ƀon lan nsum mpôl ƀa ƀơ chop khâl uĕh, ntop kơl ntrŭt nsôr drăp ndơ nuih n’hâm.

“Lah nsum ăp kon gâp lôch uĕh nti nsơm knơm dơi geh ngih dak kơl an kon sôt ramnh hôm bah kơi aơ ngih dak an tay nău kơl bah geh krŭng. Lah nsum mô êng rnăk gâp, âk rnăk sôt rmanh, tahen khĭt n’hanh rnăk geh soan đah cách mạng ri jrô kan thương binh xã hội uănh mĭn dŭt âk. Rnôk kop ji, rnôk geh nău, rnôk jay geh phŭt sial lơh tât kơl ngăch”.

Nkuăl Cŭ M’gar aƀaơ geh rlău 3.000 nuĭh geh soan đah cách mạng; 5 mê̆ Việt Nam janh dăng hôm e rêh. Wa Nguyễn Hồng Minh, Kruanh jrô kan Lao động, Thương binh xã hội nkuăl Čư M’gar, an gĭt, gưl ủy, n’gâng kan ăp gưl uănh mĭn ntĭm rđău ƀư uĕh nău kơl đah nuĭh geh soan đah cách mạng.

“Tât aƀaơ lĕ rngôch ăp rnăk dơi kơl ta lam nkuăl geh rnoh nău rêh tâm ban mô lah âk lơn rnoh tâm ban nsum bah nkuăl, ăp nău kơl đah nuĭh geh soan dơi ƀư dŭt uĕh n’hanh di nău ntrŭnh, lơn lah nău kơl an dơi ngăch tât ty nuĭh geh soan”.

Wa Lê Thị Tường Vân (ao gŭr) rhơn tâm jay mhe

Lam n’gor Dak Lak geh rlău 45.000 nuĭh geh soan đah cách mạng. Trong kan mât uănh nău rêh ndoh ndơ n’hanh nuih n’hâm an ăp rnăk dơi kơl, nuĭh geh soan đah cách mạng dơi ăp gưl ăp nău kan dŭt uănh tât. Ndrel đah nău ƀư tĭng uĕh ăp kơl bah Đảng, Ngih dak, tâm 5 năm dăch aơ, ăp ntŭk tâm n’gor lĕ ƀư tĭng trong kan mât rong; ntop kơl prăk năp ndoh ndơ, rdâk hao săk jănl  kơl nkra, ndâk ƀư jay gŭ an ăp nuĭh đah dĭng lĕ rlău 70 rmen prăk.

Tĭng wa Nguyễn Quang Thuân, Groi Kruanh N’gâng kan Lao động Thương binh n’hanh Xã hội n’gor Dak Lak, bôl trong kan uănh mĭn an nuĭh geh soan, rnăk dơi kơl dơi ntrôl dăng tâm ăp năm mhe rlău, yơn mô hŏ lam hvi lĕ. Ta n’gor hôm e geh 165 rnăk mpeh tâm rnăk dơi kơl, bơi 1 rbăn nuĭh geh soan hôm e jêr jŏt đah jay gŭ. Wa Nguyễn Quang Thuân mĭn lah, ăp nău hôm e aơ mbra dơi mkra tâm khay ơm ngăn:

“Tât aơ tay mbra geh ăp trong uănh na nê̆ tĭng rnăk, tĭng ntŭk lah mô tŏng rnoh ndơ ƀư, lah rnăk nĕ mô hôm soan pah kan tay ri đă N’gâng kan rgâl an nuĭh dơi ntop kơl rêh jêng gay geh nău kơl n’hanh nsrôih tât dŭt năm 2022 ri mbra mkra 165 rnăk ach o, ntŭk mô tŏng ri mbra kơl nta an rklaih ach o. Đah ăp rnăk jêr jŏt đah jay gŭ nsrôih tât dŭt năm 2023 mbra ntơm dơi mkra jay an nuĭh geh soan ta lam n’gor”.

Ta nkual Tây Nguyên hôm e âk jêr jŏt, ăp nău ƀư ngăn ngên bah ăp gưl, ăp nău kan Dak Lak năm bah năp lĕ rgop n’hao nău rêh ndoh ndơ, nuih n’hâm an ăp rnăk dơi kơl, nuĭh geh soan đah cách mạng, ƀư tĭng nău way ơm “Ngêt dak nkah gĭt tu tơm” bah rnoi mpôl he./.

Nuĭh rlang: Y Sưng Phê Ja