Tĭng nau mbơh, 6 khay bôk năm, n’gor Dak Lak hŏ ntrŭnh ƀư rjăp ăp nau ntrŭnh bah Đảng, pháp luật bah Ngih dak mpeh tahen, neh dak, nau kan biên phòng; ƀư ân ngăn ăp bôk nau kan, nau nchrăp tâm di ma n’gor.

            Tĭng Đại tá Lê Văn Hùng, Groi Kruanh rđau kan, Kruanh mbơh nchră nau, N’gâng kan rđau kan n’gor Dak Lak, n’gor hŏ tâm rgop rjăp ma nau hun hao văng sa, rêh jêng đah nau ƀư nâp nâl neh dak, rnă njrăng. Ăp rmôt kan geh tât tâm rgop uănh năl ăp nau ntrŭnh, nau kan gay nkre tŏng dơi nau hun hao, nkre đăp mpăn neh dak. N’gor ƀư ân tam ăp nau kan rdâng sok joi tui ka tih dôih IUU, mât nâp nŭih kan, duk mpan mra râng mât neh dak lêng, gôl dak; n’hao nau mât, mât n’har bri, tâm rgop ƀư ân tam nau kan pă n’gâng n’har, n’gâng ntăm đah dak băl Campuchia.

            Rmôt dân quân tự vệ ndrel dự bị động viên lŏ geh ƀư nâp. Nau kan leo săch lăp tahen geh ƀư rjăp, kloh rvah, ƀư jêh 100% nkô̆ nau, đah bơi tât 5.500 nŭih lăp tahen. Ăp rmôt tahen, Công an ndrel Biên phòng mât nâp nau tâm rgop rjăp tâm nau mât đăp mpăn chính trị, đăp mpăn nau rêh, mât ăp nau kan chính trị khay, nkre ƀư ueh nau tơm tâm nau njrăng rdâng trôk nar lơh, joi kơl nau khuch rmanh. Đại tá Lê Văn Hùng mbơh, ăp ntŭk kan, rmôt tahen n’gor Dak Lak ndâk tŏng nau nchrăp, nau kan tâm lơh, mra tâm lơh:

            ‘Ăp ntŭk kan, rmôt kan tâm n’gor ndâk tŏng ăp nau nchrăp, nau kan tâm lơh, mra tâm lơh; năl rgâl, ntop tay ân tâm di ma nau kan, nau ƀư ndrel ƀư ân nâp nau rđau đă rnôk ƀư n’gâng kan tâm n’gor bar gưl; ƀa ƀơ ƀư nau ntĭm nti, nchiărr, ƀư tâm boh nau kan đah ăp nau ƀư, nau mra geh rklaih năn, săk tam ăp nau tât. Ntrŭnh ƀư ăp nau nchrăp tâm lơh “Trong trôk nâp nâl” gay ndâk nuih n’hâm trong trôk lam âk, âk gưl, nâp nâl; ăp nhoat ƀư jêh nau kan tâm lơh njrăng rdâng ndoh ndơ dŏng mpar mô kâp nŭih ƀĭt”.

            Wa Đào Mỹ, Groi Kruanh UBND n’gor Dak Lak mbơh, 6 khay dŭt năm 2026, nau kan tahen, neh dak tâm n’gor ndrel nau kan biên phòng hôm âk nkô̆ nau tơm.  Wa Đào Mỹ đă ăp rmôt kan, tahen lŏ ƀư ân rjăp, ntrŭnh ân săk tam nau ntrŭnh bah Đảng, pháp luật bah Ngih dak, n’hao nau mât, mât nkuăl n’har bri bah neh dak, mât nŭih kan, duk mpan, ndơ dŏng, mra rgum ndrel mât nau ƀư tơm gôl dak, dak lêng; ntrŭnh ƀư ân rjăp ăp nau kan rdâng sŏk joi tui ka tih dôih (IUU), nkre lah mât nau mra tâm lơh, n’hao nau nâp ntĭm nti, nchiăr, tŏng dơi nau kan tâm rơh mhe.

            Kơl an ndâk njêng mrôt tahen ndrel ntŭk kan tahen tâm nkuăl ƀư nâp dăng ăp ntil, tŏng dơi nau ŭch nau kan tâm rơh mhe. Mât nâp rjăp nau kan mra tâm lơh, đăp mpăn n’hao nau nâp nau kan ntĭm nti, nau tâm rgop nsum đah 3 rmôt tĭng nau dơi, nau ntrŭnh 03 năm 2019 bah Chính phủ”.

            Di rnôk aơ, ndơn nau đă ân bah N’gâng kan neh dak, Quân khu 5, wa Đào Mỹ, Groi kruanh UBND n’gor Dak Lak pă Bằng khen bah N’gâng kan neh dak ân du hê nŭih, pă Bằng khen bah Quân khu 5 ân 2 rmôt, 7 nŭih hŏ geh nau dơi blau ngăn tâm nau ntrŭnh ƀư ăp nau kan tahen, neh dak 6 khay bôk năm 2026./.