Kêng măng 30/10, n’gor Dak Lak ƀư tâm nchră sơ kết uănh năl lôch jêh nău dơi tâm rgop kan nsum, tâm boh pâl nđaih đah 17 n’gor, nkual ƀon têh lam  dak, lvang năm 2019-2024. Ntơm bah năm 2019 tât aƀaơ, n’gor Dak Lak hŏ ƀư ký ton tâm rgop, tâm boh pâl nđaih đah âk n’gor, nkual ƀon têh lam dak, rgum tâm 4 trong kan: ntrŭt ntrôl ngăch, nkơnh n’hơ pâl nđaih; tâm ôp nău lư mpeh nô nău hun hao pâl nđaih, dăp rgum n’hanh kuăl jă ntuh kơl, ƀư njêng âk ntŭk ndơ pâl nđaih; kơi  năp nti, ntĭm nti tơm nuĭh kan pâl nđaih.

Kan nsum đah ăp n’gor tĭng ƀư ăp hội chợ pâl nđaih dak bah dih ăp năm; tâm ôp nău lư, tâm rgop kan nsum trang thông tin điện tử pâl nđaih, ăp ndơ pơk nkoch nău lư ta mạng xã hội; tât leh tâm ôp mpeh nô nău tĭng ƀư ăp tâm boh hŏ ký; kan nsum, ntuh kơl rdâk njêng n’hanh n’glăp dŏng ăp tuor trong pâl… Nơm geh kơt nê̆, tâm 5 năm aơ n’gor hŏ wơt rlău 5,6 rkeh tơ̆ năch, nsĭt geh bơi 4.300 rmen prăk. Ta tâm nchră, đại biểu hŏ tâm ôp, tâm nkoch nău ngăn geh an ƀư tâm rgop rkŭm, tâm boh đah 2 n’gor, 3 n’gor, nchŏng luh ăp mpăng đêt, kŏ kol, ntơm bah nê dăn đă ăp trong nkra n’hao geh nău tam âk tâm rgop, tâm boh nău kan.