VOV4.M’nông:   Ăp nar bah năp, bôl rnoh khlay pring, xăng lĕ hŭch âk yơn rnoh khlay rdêng ndơ ta Dak Lak hôm e “nâm ơm”. Âk nuĭh tơm doanh nghiệp rblang lah, khân pơng ŭch nar khay gay kâp rơh rgâl rnoh khlay pring xăng đăp mpăn lơn mư ƀư rgâl rnoh khlay prăk rdêng ndơ.

          Hợ tác xã nchoăn rdêng 63 n’gor nkual ƀon têh Dak Lak geh nklăp 100 bôk ndeh rdêng ăp ntil, hăn ăp trong hăn ăp n’gor nkual ƀon têh lam dak. Wa Đặng Quảng Điện-Kruanh HTX nkoch, rnôk rnoh khlay pring, xăng hao hô ngăn 31.000-32.000/lít xăng, pring tâm rnôk ăp khay 5,6 n’hanh 7/2022, doanh nghiệp lĕ an n’hao prăk rdêng ndơ nklăp 15% nkôp đah bôk năm. Bôk hao yơn doanh nghiệp hôm e mô tŏng tâm rnôk dăch aơ. Nău mât ăp bôk ndeh nchoăt knŭng gay mât năch. Bah khay 7/2022 tât aƀaơ, rnoh khlay pring, xăng na nao n’hanh dôl ta rnoh 26.100/lít xăng n’hanh 24.300/lít pring, ri doanh nghiệp mô hŏ dơi hŭch prăk rdêng. Nkô̆ nău đah rnoh khlay pring, xăng kơt aƀaơ, doanh nghiệp ntơm trok prăk dŏng mô hŏ geh prăk sa. Wa Đặng Quang Điện rblang:

“Đah rnoh khlay pring, xăng kơt aƀaơ nklăp 25.000-26.000/lít ri đah doanh nghiệp mư ntơm đăp mpăn, ndeh nchoăt ri knŭng tŏng pring n’hanh nuĭh ƀĭt ndeh, nuĭh tung dăp. Aơ lah rnoh rĭng geh dơm, mô di rnoh đêt. Lah pring xăng plơ̆ tay rnoh 22.000-23.000lít n’hanh đăp mpăn jŏ jong bah 2-3 khay ri mpôl hên mbra mĭn n’hŭch prăk rdêng gay đăp mpăn nău geh an nuĭh năch”.

Ăp doanh nghiệp nchoăn rdêng nuĭh ta Dak Lak mô hŏ ƀư n’hŭch rnoh khlay rdêng bôl pring, xăng hŭch âk khay dăch aơ.

Hôm doanh nghiệp rdêng nuĭh Trần Toàn ta nkual ƀon têh Buôn Ma Thuột geh 6 bôk ndeh rdêng nuĭh hăn trong Dak Lak-Hà Nội. Wa Trần Trung-Kruanh doanh nghiệp an gĭt, rnôk rnoh pring, xăng ta rnoh bah dâng 20.000/lít, prăk dŏng rwăt pring xăng an du rơh hăn Dak Lak-Hà Nội lĕ 22-23 rkeh prăk. Rnoh khlay vé rnôk nĕ 650.000/du hê, ndoh ndơ lah 3 rkeh/tấn. Yơn lah, rnôk rnoh pring xăng hao âk ngăn 32.000lít, prăk dŏng du rơh hăn roh bah 35-36 rkeh prăk, jêng lah hao 1,5 tơ̆ ri doanh nghiệp an n’hao prăk rdêng ndơ hao 800.000 prăk/vé. Rnoh hao aơ tâm ban nklăp 15% nkôp đah bôk năm 2022. Aƀaơ rnoh khlay xăng lĕ hŭch n’hanh dôl ta rnoh 25-26.000/lít, du tơ̆ ndeh hăn hôm e hoach nklăp 30-32 rkeh prăk, n’hanh rnoh aơ mư ntơm sĭt prăk ơm, mô hŏ geh sa gay dơi n’hŭch khlay veá mô lah prăk rdêng ndơ. Wa Trần Trung rblang:

“Prăk ncho ndeh ri he saơ nĕ, du tơ̆ hăn hoach rlău 35 rkeh prăk dak pring, aƀaơ hŭch ri knŭn g geh 2-3 rkeh prăk dơm, hôm e hoach 32 tât 33 rkeh prăk. Lah nsum rnoh khlay pring xăng kơt aƀaơ hôm e âk, mpôl hên mpŏng hŭch tay. Lah đah rnoh 22.000 rbăn/lít ri doanh nghiệp mbra n’hŭch prăk vé dâl ta rnoh 650.000/vé n’hanh 3 rkeh prăk/tấn ndoh ndơ”.

Prăk nchoăn rdêng mô hŏ dơi doanh nghiệp ta Dak Lak hŭch bôl rnoh khlay pring xăng lĕ hŭch âk.

Kơp bah N’gâng kan ntung trong Dak Lak an saơ, lam n’gor aƀaơ geh rlău 17.000 ndeh rdêng ăp ntil. Tâm nĕ geh 14.000 ndeh rdêng ndơ, 500 bôk ndeh rdêng nuĭh ƀa ƀơ, 250 bôk ndeh tâm ton, 350 bôk ndeh buýt n’hanh nklăp 2.500 bôk ndeh taxi. Tĭng wa Lê Đình Minh0Groi Kruanh N’gâng kan ntung trong Dak Lak, yor mô geh trong nchâp đă ăp doanh nghiệp an rgâl prăk rdêng rnôk rnoh pring, xăng hao âk mô lah jŭr đêt, jêng geh nău rgâl đah rnoh khlay ri lĕ rngôch doanh nghiệp rgâl jŭr hao êng prăk rdêng, n’gâng kan mô lah nău kan dơi kan jêr dơi nking n’gang. Yơn lah rnôk pring xăng hŭch âk kơt aƀaơ, n’gâng kan lĕ ƀư nkoch trêng rgŏ jă ăp doanh nghiệp rgâl jŭr thuk prăk rdêng, gay đăp mpăn uĕh tâm di đah ăp ding.

 “Mpeh mât uănh ngih dak, N’gâng kan ntung trong lĕ ƀư công văn nkoch trêng n’hanh rgŏ jă tât ăp ntŭk doanh nghiệp nchoăn rdêng, nuĭh tơm ndeh n’hŭch prăk rdêng gay đăp mpăn rnoh khlay, đăp mpăn ndoh ndơ hăn rdêng kơt nuĭh năch dơi rhŏ an rdêng prăk tâm di. Nău aơ, an bah doanh nghiệp khân pơn g ƀư, khân pơng n’hŭch gay tâm rlong n’hanh mât năch, n’hanh rnôk pring xăng jŭr tay ri rnoh khlay prăk rdêng hŭch nuĭh năch mô plơ̆ ndôn nkơi đah doanh nghiệp bah nơm”.

Nuĭh rlang: Y Sưng Phê Ja