Mbơh ƀư Luật neh ntu 2024 lăp ngăn ngên, lơ 8/10, Ban ntĭm rđău mât uănh, dŏng neh bah ăp công ty lŏ mir neh bri n’gor Dak Lak lĕ ƀư rƀŭn tâm nchră rmal, mkra ăp nău geh tât rnoh neh geh tu tơm nông, lâm trường. Mbơh ƀư ăp nău ntrŭnh pháp luật mpeh neh ntu, n’gor Dak lak kơp uănh geh rlău 188.000ha neh bah ăp nông lâm trường mpeh tâm nuĭh jao an gưl nkuăl mât uănh. Yơn lah, tât khay 7/2024, n’gor mhe knŭng uănh an geh 2 trong mkra dŏng neh geh tu tơm nông lâm trường yor UBND ăp nkuăl, nkual têh, nkual ƀon têh ƀư, 20 trong mkra ƀa ƀă dôl tâm lvang nkra, ntop tay an jêh, mô hŏ mbơh uănh an.

Wa Nguyễn Thiên Văn, Groi Kruanh UBND n’gor Dak Lak an gĭt, nău mbrơi uănh an ăp trong mkra dŏng neh đah rnoh neh geh tu tơm nông, lâm trường khuch mô jêt tât wăch rgum ntuh kơl, đăp mpăn nău rêh, hun hao wăng sa ta ntŭk. Yor nê, gay Luật neh ntu 2024 hăn lăp ngăn, mkra săk rnglăy ăp nău geh tât rlău n’gul rkeh ha geh tu tơm nông lâm trường, đă tâm rgop rjăp đah ăp n’gâng kan, nău kan, ban, nău kan n’hanh n’gâng kan gưl nkuăl.