Nau nchrăp mbơh chính trị ndŏ luh nkô̆ nau văng sa khlay bah n’gor Dak Lak tâm lvang năm 2025-2030. Ngăn lah nau hun hao văng sa ntơm 11,5% ăp năm hao gŏ lơ; nau geh du hê bôk nŭih năm 2030 geh 160 rkeh; tuch tăm hao 6,84%/năm; công nghiệp, ndâk nkra hao 18,1%; nau kan hao 11,25%.

            Rgop nau tâm rơh rƀŭn, wa Đào Tấn Lộc, Bí thư n’gor uỷ Phú Yên ơm mbơh lah du đê̆ nkô̆ nau hôm prêh rđil đah nau geh, ngăn lah tâm rnôk aƀaơ:

            ‘Hun hao tuch tăm geh 6,84% tĭng gâp kơt nê lah prêh ir, yor đê̆ geh nau ƀư kơt nê, rlau ma nê nau kan tuch tăm nsing tâm mih nar ndrel ntŭk tăch, nơm ê dơi rklaih dơi 2 nau kan aơ ri ma ân nkah njrăng. Jêh ri hun hao nau kan ndâk nkra lah 18,1% kŏ lah rnoh mrô têh. Lah nơm nsôih ndâk nkra mra geh nau dơi rlet, yơn nau kan công nghiệp păng nsing tâm âk tơm prăk ntuh kơl tâm nau rêh jêng”.

            Rnê prêh nau kan nchrăp bah Tiểu ban văn kiện, wa Cao Đức Khiêm, Groi Bí thư Rnâng kan n’gor uỷ Dak Lak, ngăn lah 17 nkô̆ nau, 5 rmôt kan kan ndre; 3 nau kan rgâl mhe gah nchrăp luh. Yơn lah, wa lah rjăp tay nau đă tât nau kan hun hao nŭih pah kan ân geh nau dơi prêh:

            ‘Gâp saơ ăp đồng chí mhe knŭng uănh khlay tâm cán bộ mât nau ƀư nau kan, ê geh nkah tât ăp nŭih ƀư nau kan lah kỹ sư, nŭih ƀư nau kan geh nau blau gay gĭt dơi ngăn geh dŏng tâm tơm prăk FDI. Tal bar lah nau geh dơi bah ntŭk ntu, geh kơt lah hôm jê̆, ri nơm ân geh ntop tay nau rgum ƀư nau kan bah n’gor Dak Lak ăp ntŭk kan công nghiệp, công nghiệp geh dơi pơk hvi prêh, leo tât nau geh dơi nâp mro mrăng”.

            Rơh rƀŭn kơp dơn 11 nau rgop, geh 5 nau nchih mơh ndrel nau đă rgop song. Djăt nau đă tâm rơh rƀŭn, wa Nguyễn Đình Trung, Uỷ viên Trung ương Đảng, Bí thư n’gor uỷ, Kruanh Tiểu ban văn kiện Đại hội Đảng bộ n’gor Dak Lak tal 18 mbơh, Tiểu ban mra djăt mĭn ăp nau mbơh đă:

            ‘Hên mra djăt ăp ntil ndrel ntrŭnh ƀư tâm ăp nau kan ngăn, rnôk ntrŭnh ƀư nau ntrŭnh Đại hội, mô lah kơl an nau kan ân cán bộ rđau kan bah gưl uỷ, bah HĐND, UBND gay ma ntrŭnh ƀư âk nau kan bah Dak Lak ueh lơn. Jêh rơh rƀŭn aơ n’gor kŏ ŭch lŏ ndơn geh nau rgop đă bah ăp ntoh măt ndrel phung hên ŭch geh nau dơi ân ƀư nâp gay ma geh nau djăt kơt”./.