Đồ án dăp rgum lam lĕ rngôch nkual ƀon têh Đà Lạt n’hanh nkual kiău ma tât năm 2045 dơi HĐND n’gor Lâm Đồng uănh an dŏng geh 9 nkual tâm pă hun hao ntŭk gŭ rgum, hao 5 nkual đah ăp dăp rgum bah năp nơh. Rnoh hvi Đà Lạt dơi pơk hvi rlău 9 tơ̆ đah aƀaơ đŏng. Rơh hop tâl 19 HĐND n’gor Lâm Đồng khóa X ƀư tâm nar 4/10 hŏ n’hơr ti ŭch an dŏng đồ án rgâl dăp rgum lam lĕ rngôch nkual ƀon têh Đà Lạt n’hanh nkual kiău ma tât năm 2045. Nău rgâl  dja gay tŏng an nău ŭch geh  aƀaơ n’hanh let năp tay bah nkual ƀon têh, tâm ban kơt nkra ăp nkô̆ nău mpăng đêt, khoah mpeh kol khan ntung trong đŏng, ntŭk gŭ rgum dôl geh lơh chrai, lơn lah tâm nklang glo tơm bah Đà Lạt.

Tĭng Đồ án rgâl, n’glĕ tât n’har dăp rgum lah lĕ rngôch n’glĕ n’har nkual ƀon têh Đà Lạt n’hanh ăp nkuâl Lạc Dương, Đơn Dương, Đức Trọng n’hanh du gâl bah nkuâl Lâm Hà geh rnoh prêh  850m let lơ rđĭl đah rnoh dak lêng, đah lĕ rngôch rnoh hvi rlău 336.000ha. Tâm nê, nkual ring tam geh tay nkuâl Đam Rông. Đồ án dăp rgum lam lĕ rngôch dja ƀư jêng ngăn ngăn ăp trong nchrăp têh jong, rƀŏng tât hun hao bah Dăp rgum rdâk njêng nkual n’gor Lâm Đồng, tŏng đah nău ŭch geh mât dŏng n’hanh hun hao wăng sa – rêh jêng kon nuĭh, văn hóa – ntŭk gŭ rgum – rup uĕh nhih jay bri dak ta nkual ƀon têh Đà Lạt n’hanh wăr kiău ma. Nkre, mât dŏng geh nău tam neh ntu,  bri dak ntĭt êng bah nkual ƀon têh Đà Lạt gay hun hao nkual ƀon têh uĕh mhe, geh săk tơm, njêng suan wăch rgum uĕh bah ntŭk gŭ rgum, tĭng kơn n’hao săk geh ntŭk gŭ rgum.