Ntoh ta ntŭk tăch mô hŏ tŏng 5 năm, yơn ndơ bah lêr tă bah Công ty TNHH Nkra njêng tăch rgâl Hoa Mặt Trời Farm, ta xă Ea Ning, nkuăl Cư Kuin, n’gor Dak Lak lĕ geh ntŭk tăch tâm pă ta âk nkual ƀon têh, geh rnoh tăch đăp mpăn ta ăp ntŭk tăch điện tử. Nô Đặng Đình Luân, giám đốc công ty an gĭt, ndrel đah ndơ mhe, nău kơt dŏng công nghệ tâm ăp nău ƀư nkra njêng, ntrôl dăng nkoch mbơh, mpla nsơ ndơ ta ăp trang mạng xã hội n’hanh ntŭk tăch điện tử lĕ kơl doanh nghiệp gĭt tât ntŭk tăch ngăch n’hanh săk rnglăy lơn.

Công nghệ mrô aƀaơ kơl an ăp doanh nghiệp jêt n’hanh ăp nuĭh ntuh kơl rdâk njêng nău kan geh prăk đêt dơi dơh nơih gĭt tât nuĭh dŏng lơn, mông nar, ngăch mbra ngăch lơn. Yor aƀaơ trong nkoch mbơh mạng xã hội dŭt âk, nuĭh rwăt ta nĕ âk ntil đah năm deh, nău ŭch.

Dŏng đŏng nău dơh bah rgâl mrô n’hanh tăch rgâl điện tử ta ăp trong mrô, nô Trương Hoàng Ký, ta phường Ea Tam, nkual ƀon têh Buôn Ma Thuột, n’gor n’gor Dak Lak, rdâk njêng nău kan mhe bah sêt đông trung hạ thảo an lah, aơ lah trong gĭt tât nuĭh rwăt dơh, uănh tăng n’hanh ntêm nkrem prăk, dŭt tâm di đah ăp nuĭh ntơm rdâk njêng nău kan dôl đêt đah prăk.

Nău dơh bah tăch ndơ ta mạng xã hội lah dơi tăch âk, đah wơt nuĭh rwăt ndơ bah gâp mbra hvi têh lơn. Gâp dơi ndơ̆ ăp ndơ n’hanh ăp rup gui gâp dơi nkra êng, quay êng n’hanh ndơ̆ êng tâm nĕ.

N’hêl na nê̆, rgâl mrô ta ăp doanh nghiệp mô knŭn tâm nău ƀư nkra njêng, tăch ndơ ma hôm lah nău rgâl mhe tâm mât uănh, ƀĭt joet n’hanh pơk dŏng nău kan. Tĭng wa Hoàng Thị Thanh Thủy, Giám đốc công ty TNHH mbơh ntĭm soay Saf, ta nkual ƀon têh Buôn Ma Thuột, jêr jŏt têh ngăn bah doanh nghiệp rnôk gĭt tât rgâl mrô lah nkô̆ nău kon nuĭh, nuĭh pah kan wât mpeh rgâl mrô. Rnôk gĭt trong ƀư n’hanh kơt dŏng di trong ri rgâl mrô mbra nsĭt tay săk rnglăy, dơi rgop geh âk, nsĭt geh bah doanh nghiệp.

Rgâl mrô kơt rgâl mhe mĭn njêng mhe tâm trong mât uănh, ƀĭt joet doanh nghiệp, pơk dŏng ăp phần mềm kơt dŏng, mkra rnoh mrô bah doanh nghiệp rnôk kơt dŏng tâm nău jêng dơh đah nuĭh kan, n’hâm soan ndơ dŏng n’hanh công nghệ. Nău rgâl mhe kơt dŏng tâm nău rêh dŭt ngăn ngên, kơt nău dŏng sam ƀŭt sam tra bah du trong kloh rah wah, ndơ̆ prăk soay doanh nghiệp tŏng ăp n’hanh di na nê̆ lơn”.

Rgâl mrô tâm doanh nghiệp lah ngoăy tâm ăp nkô̆ nău bah hun hao wăng sa mrô ta Dak Lak. Đah bơi 13 rbăn doanh nghiệp dôl pah kan, n’gor n’gluh an nău rƀŏng tâm năm aơ mbra geh nklăp 50% rnoh doanh nghiệp dŏng mrô, 100% doanh nghiệp dŏng sam ƀŭt sam tra điện tử.

Wa Nguyễn Tuấn Hà, Groi Kruanh rnâng kan UBND n’gor Dak Lak an gĭt, gay ntrôl hun hao trong ntơm rdâk njêng nău kan ta ntŭk, n’gor lĕ geh âk trong mkra ntrôl ntơm rdâk njêng nău kan tă bah rgâl mrô, tâm nĕ geh nău n’hao ntuh kơl an công nghệ, hun hao ndoh ndơ kỹ thuột mrô lam dak.  

N’gor mbra ndâk njêng trung tâm dữ liệu (big data) ƀư tĭng ntĭm rđău bah Chính phủ n’hanh N’gâng kan Thông tin n’hanh Truyền thông. Nĕ lah ngoăy tâm âk nău ŭch khlay an dơi rgâl mrô tâm wăng sa, tâm nău rêh jêng n’hanh đah kon nuĭh. Aơ lah lah nău ŭch ngăn, lah n’hâm soan mhe an nău hun hao wăng sa, ntrong leo lam ntŭr neh n’hanh he an ƀư.

Nău kơt dŏng rgâl mrô lĕ n’hanh dôl nsĭt tay nău geh an doanh nghiệp ntơm rdâk njêng ta Dak Lak tâm nău pơk dŏng n’hanh tăch ndoh ndơ. Đah trong hun hao tâm rơh cách mạng 4.0, doanh nghiệp dơi kơt dŏng ăp trong mkra rgâl mrô gay rhoăt đêt tâm ƀah, ban nău rgâl ngăch bah công nghệ n’hanh ntŭk tăch, jêng jâng nsan hun hao tĭng trong nâp nâl.