Đắk Lắk aƀaơ geh rlău 41 rbăn ha sầu riêng, tâm nĕ geh klâp ma 30 rbăn ha dôl geh lêh play, rnoh geh yan aơ nchroh geh klâp ma 500 rbăn tấn. Yơn lah, lam n’gor Đăk Lắk mhe geh 280 rnoh mbrô nkual tăm đah klâp ma 7.500ha, n’hanh 42 rnoh mbrô ntŭk tâl dung geh mpeh Trung Quốc an dŏng. Aƀaơ hôm nha geh 165 rnoh mbrô nkual tăm n’hanh 66 rnoh ntŭk kan tâl dŭng le ƀư lôch lĕ săm ƀŭt yơn hôm nha geh kâp Tổng cục Hải quan Trung Quốc (GACC) uănh n’hêl.

Tĭng nău mbơh bâh UBND  n’gor Đăk Lăk, bâh ntơm geh lĕ rngôch hồ sơ aơ geh an dŏng rĭ rnoh neh geh pă rnoh mbrô nkual tăm kanŭng geh klâp ma 40% rnoh neh dôl geh sŏk dŏng. Nău nĕ tâm ban geh tât 295 rbăn tấn sầu riêng mbra geh nău jêr mpeh ntŭk tăch an dak bah dih.

Ndrel đah Đăk Lăk, ăp n’gor Gia Lai, Lâm Đồng, Quảng Ngãi le geh mbơh âk nău jêr đŏng rnôk geh mbơh tơih Nghị định 38 mpeh rnoh mbrô nkual tăm sầu riêng n’hanh ntŭk tâl dŭng. Ăp ntŭk mbơh dăn ơm geh nău ntĭm dơn ngoăy mpeh nău kan ndơn đă tăch dak bah dih, nkre lah ƀư lôch nău mât uănh rnoh mbrô lôch Nghị đinh geh nău kan tam.

Wa Nguyễn Hoàng Hiệp, Groi Kruanh n’gâng kan tuch tăm n’hanh ntŭk gŭ rêh an gĭt, n’gâng kan dôl mĭn uănh rgâl mhe Nghị định 38 năm tĭng nău ntĭm đă bâh Thủ tướng Chính phủ tĭng nău kan ueh di lơn, nkre lah ƀư mbơh rnoh mbrô lĕ rngôch nău kan pă rnoh mbrô tĭng nkual tăm n’hanh ntŭk tâl dŭng, rgâl dăng bâh nău mât uănh bôk năp jêng mât uănh ba kơi gay ma bah ir jêr an ƀon lan n’hanh doanh nghiệp.

Đah yan sầu riêng năm aơ, n’gâng kan tuch tăm n’hanh ntŭk gŭ rêh mbra tâm rgop đah ăp n’gâng kan, ăp ntŭk kan pah kan đah mpeh Trung Quốc gay ma ntrôl mbơh pă rnoh mbrô nkual tăm, ntŭk tâl duưng, nkre lah đă hun hao tăch ndơ an dak bah dih đah sầu riêng an nđik. Yơn lah, ntrong kan tơm lah gay ma an n’gâng kan sầu riêng  hun hao nâp nâl hôm nha lah nău knơm rdâk njêng bâh ntŭk tăch rgâl đah trong pah kan geh nău dơn kan lơn. Wa Nguyễn Hoàng Hiệp lah na nê̆.   "Ŭch rdâk njêng nău knơm bâh ntŭk tăch rgâl rĭ ăp ntil ndơ an geh gĭt na nê̆ tu tơm, gĭt ntil ndơ mơh nuĭh ƀư, mhâm ƀư n’hanh rnôk geh ƀư tih rĭ an geh gĭt năl nuĭh dơn kan. Rnôk ma nău kan mbơh tơih tu tơm nău kan geh leo dŏng tŏng ăp, mpôl hên mbra ndrel đah ăp ntŭk ƀư tĭng tâm ban nău kan aơ.