Rlet rlău 7 rmôt tâm rlong êng gay geh dăng ta rgum tâm rlong mĭn ƀư mhe ndơ nkra njêng tay bah ăp ka su yor Đoàn xă ƀư, ndơ Bản đồ Việt Nam bah chi đoàn ƀon Cuôr Dăng A mpơl nău mĭn ƀư mhe. Ăp đoàn viên lĕ dŏng “ndŏk nja” gay ƀư jêng ndơ nkre geh khlay dŏng nkre geh nău nkoch trêng âk. Yuh H Tuyết Niê, Bí thư chi đoàn ƀon Cuôr Dăng A, xă Cuôr Dăng, nkuăl Cư M’gar nkoch:

Tât đah rơh tâm rlong aơ, chi đoàn bah ƀon gâp djôt tât ndơ bản đồ Việt Nam dơi ƀư bah ăp ndơ nkra njêng tay, dŏng tâm nău rêh ăp nar kơt n’ha rđaih, dĭng ngêt dak, ndrŭp gri n’hanh ăp ndơ dŏng êng. Ndơ aơ njuăl tât nău mbơh mpeh nău rŏng ƀon lan, neh dak, kơt ntô̆ n’hao rnoi nuĭh, ƀư tơm n’hanh lĕ rngôch neh ntu. Bah nĕ, săk gâp kơt rơh druh ndăm mbra nsrôih tay tiăr nti gay ndâk njêng n’hanh mât njrăng neh dak nâp nâl.

Ndrel đah rgum tâm rlong, tâm pâl, khay druh ndăm năm aơ Dak Lak geh âk nău ƀư rgum âk nuĭh, ăp nău ƀư kơl kan yor ntŭk gŭ rêh. Đah bôk nău “Druh ndăm hăn lor, kơl kan yor nău rêh nsum mpôl”, âk nău ƀư dơi ƀư tâm lam n’gor kơt Nar pơh uĕh nđĭr, nar kơl kan ndâk ƀư nkual ƀon têh uĕh lăng, hăn pah kan ăp rmôt rhŏ an nsum mpôl.

 Ndrel đah ăp nău ƀư nsum yor đoàn gưl bah lơ ƀư, đoàn bah dâng ƀư tĭng âk ndơ ƀư, nău ƀư ngăn ngên, tâm di đah nău ngăn ta ntŭk, ƀon lan nơm, Yuh H Vinh Êban, Chi đoàn ƀon Kroa B, xă Cuôr Dăng, nkuăl Cư M’gar an gĭt, bơi 300m trong cờ neh dak lĕ dơi mpôl druh ndăm ƀư gay mbah rhơn ăp nar lễ têh tâm khay 3. Ndrel đah nĕ, druh ndăm ƀư gay râng răk ntŭk ntô gŭ âm, muĭh rwach ndŏk nja ta nkual  ndrâm dak Ea Mkang n’hanh tăm tơm si ta du đêt nkual ntŭk gŭ rêh.

Gâp ndrel đah ăp băl đoàn viên druh ndăm lĕ hăn ndâk ƀư trong cờ druh ndăm, tăm kao n’hanh ƀư koaih ndrâm dak. Tă bah ăp nău kan aơp, gâp saơ răm yor gâp lĕ rgop soan tâm nău ndâk ƀư ăp ndơ, gưl kan druh ndăm tâm ƀon.

Tĭng nô Y Lê Pas Tơr, Groi Bí thư Rnâng kan Tỉnh Đoàn, Kruanh Hội liên hiệp Druh ndăm Việt Nam n’gor Dak Lak, rlău 3 pơh mbơh ƀư ăp nău kan  khay druh ndăm, lĕ geh bơi 220 rmôt kơl kan, ƀư rlău 200 ndơ ƀư, gưl nău kan ta ăp ntŭk ƀon lan gŭ. Bơi 160 rmôt ƀon lan gĭt blău dơi ndâk njêng, râng ntop kơl nti nău blău mhe an nuĭh ƀon lan. Druh ndăm lam n’gor rgop prăk, nar luh ndâk ƀư 25 mlâm jay tâm bôk nău kan ndrel ty jŭt jăng ngih rông mpông sat.

Nău mhe bah Khay druh ndăm năm aơ lah ăp nău ƀư rƀŏng tĭng ƀư ntrong leo tâm rlong Ndrel ty jŭt jăng ngih rông mpông sat; ƀư tĭng geh săk rnglăy Nghị quyết mrô 57-NQ/TW bah N’gâng kan Chính trị mpeh rgâl hun hao khoa học, công nghệ, rgâl mĭn ƀư mhe n’hanh rgâl mrô neh dak tă bah ntrong leo ƀon lan gĭt blău nău mhe. Rnôk dơn nkô̆ nău, ăp gưl đoàn lĕ geh trong nchrăp na nê̆, ntơm ƀư tĭng tă dak bôk.

Ndâk ƀư ăp rnoh ndơ ƀư an Khay druh ndăm, tĭng bôk nău bah năm kơt ăp nău kan tâm khay 3. Tâm pă ăp rnoh ndơ ƀư na nê̆ an ăp nkuăl, nkual ƀon têh, thành đoàn n’hanh đoàn mpeh tâm n’gor, ntĭm rđău ndâk ƀư ăp rmôt têh jêng tĭng gưl, nta an jêng lĕ rngôch lam n’gor. Mpôl hên mbra nsrôih kơt dŏng âk lơn tay công nghệ mrô tâm ăp nău ƀư gay mbơh ƀư du trong jru hvi ngăn, ngăch n’hanh săk rnglăy ngăn tât đah đoàn viên druh ndăm.

Khay Druh ndăm 2025 lôch đah âk nău uĕh bah druh ndăm ăp rnoi nuĭh Tây Nguyên-nău dŭt n’hâm, lĕ đah nău kan n’hanh mpŏng ŭch nsơr soan. Ăp ndơ ƀư druh ndăm, ăp nău kan kơl an mô knŭng nsĭt uĕh ngăn ngên an nsum  mpôl ma hôm rgum nuih n’hâm tâm rnglăp, nuih n’hâm ntô̆ n’hao n’hanh gĭt ndâk njêng ƀon tơm. Rlău lơn mrô, nĕ lah ăp nău ngơi gơm, ăp mpang ty ndrel soan n’hanh ăp play nuih lĕ n’hâm.

Trong hăn nău kan bah druh ndăm mbra mô rlu ta Khay druh ndăm ma mbra rêng hvi tâm ăp nău ƀư jêt ăp nar, rgop ƀư an Tây Nguyên nar lơ hun hao nâp nâl, ndrŏng uĕh.