Tâm tom ndeh lah nău mô geh nuĭh ŭch rŏng, yơn nha hôm geh mbro đŏng, roh mô gĭt dah âk săk nuĭh khĭt n’hanh ntrôl âk rnăk tŭp tâm rngot ji, ntlơi an tay âk nău tât khuch an nău rêh. Ta n’gor Dak Nông, n’gâng kan dơi kan dôl ntrôl dăng pah kan đăp mpăn hăn ntung trong gay hŭch bah đêt ăp rơh tâm tom ndeh.

Rlău bar khay rơh ndeh continer tâm tom rot jay bah meng chợ 312, xã Đắk R’la, nkuâl Dak Mil, n’gor Dak Nông, ur sai wa Hoàng Văn Tuấn lăp tâm mir rdâk jay gŭ. Nău rngot klâng roh bar hê kon tă bah ndeh tom nha hôm ntoh mpơl đŏng. Păng nkoch.

“Roh du tơ̆ bar hê kon ri dŭt jêr chuêl ngăn. Aƀaơ ƀư jay ta aơ manh gŭ nde dơm, ta ri dŭt rngot klâng ngăn ji kop kir ngăn mô dơi gŭ. Kônh wa kiău ma đă gâp ƀư jay bah kơi gŭ, yơn bah kơi nha hôm neh nê đŏng. Jŭr ta aơ hôm ma uănh ăp ntŭk nha hôm mpơl ăp kon đŏng.”

Tâm tom ndeh mô dơn ƀư âk nuĭh khĭt roh, rnăk wâl dŭt n’hâm rngot klâng đŏng,  ma nuĭh tơm lơh geh nău kop kir, mô dơn nê geh dôih gŭ gŭk ndrung. Nô Nguyễn Văn Chí, ta xã Đắk Búk So, nkuâl Tuy Đức, n’gor Da Nông nduih tôr: hŏ lôch 3 năm gŭ ndrung, yơn nău kop kir mô hŏ bah đŏng. Măng nar 15/3/2021, nô ƀĭt ndeh rdeng ndơ, tă bah nchuăt ngăch n’hanh mô năn njrăng hŏ tom tâm bar hê kon se nti ncho ndeh máy điện. Nô Chí an gĭt:

“Gâp  mhe luh ndrung plơ̆ sĭt ƀon lan. Rnôk gŭ trôm ndrung way kop kir mpeh roh tom bar hê kon se nti khĭt. Ndă ma rnôk nê nơh he mô ndăn nchuăt ngăch, mblel ir, hŏ mô geh nău tâm tom. Aƀaơ luh ndrung mô nănh ƀĭt ndeh đŏng ôh, nklăp rgâl nău kan êng ƀư kơl mon jay mô lah ƀư công nhân ta nkual công nghiệp Bình Dương mô lah Sài Gòn.”

Tĭng Ban đăp mpăn hăn ntung trong n’gor Dak Nông, 3 năm rlơ̆ aơ, nô nău tâm tom ndeh ta n’gor hŭch. Yơn rnoh âk tơ̆ tâm tom khĭt rmanh jru  n’hanh dŭt jru hôm geh trong rƀŏng hao âk tay đŏng. Nkô̆ lơn âk lah bah nuĭh ƀĭt ndeh n’hanh du gâl tă bah ntung trong mô hŏ ăp tŏng uĕh. Wa Nguyễn Nhân Bản – Giám đốc sở Giao thông Vận tải, Groi kruanh Ban đăp mpăn hăn ntung trong Dak Nông, an gĭt du đêt trong nkra gay hŭch bah ir ăp rơh tâm tom ndeh:

“Ban đăp mpăn hăn ntung trong n’gor hŏ rđău đă ăp nhih pah kan dơi kan lah nuĭh lăp  kan nsum an ƀư ăp trong nkra nkoch trêng, đăm gĭt jru pháp luật mpeh đăp mpăn hăn ntung trong n’hao nău gĭt êng bah nuĭh râng hăn ntung trong; n’hao dăng hăn treng nđôi rsong hăn rmal lhăt ăp nuĭh tih. Way ra uănh tay, nkra uĕh tay ntung trong,  lơn lah nkra bah ăp ntŭk ndreng, ăp ntŭk geh ma nău rŭ hôch tâm tom ndeh. N’hao săk tam ntĭm nti, tâm rlong, pă an siƀŭt nău dơi ƀĭt ndeh, đăng kiểm ndeh rdeng ndơ, n’hao dăng pah kan nsum jăp mât đăp  mpăn hăn ntung trong.”   

Tâm tom  ndeh lah nkô̆ nău ji bôk rngok bah lam rêh jêng kon nuĭh, yor ăp nău tât khuch bah păng dŭt jru hô n’hanh mbro mbrăng. Gay bah ir tâm tom ndeh, ndrel đah ăp trong nkra bah nhih pah kan dơi  kan, ăp nuĭh ân  n’hao nău gĭt êng tĭng jăp pháp luật rnôk râng hăn ntung trong. Bah nê, mât njrăng êng săk nơm n’hanh rgop bah ir rngot ji, roh yot tă bah tâm tom ndeh.