VOV4.M’nông- Lôch 3 nar geh nău khuch bâh phŭt sial mbrô 2 ƀư jêng mih têh mbro, ta âk ntŭk, rhiăng ngih jay bâh nuĭh ƀon lan n’hanh rbăn ha ba mbo bâh nuĭh ƀon lan ta ăp ntŭk tâm n’gor Gia Lai lĕ geh khuch khat yor dak băm.

Tĭng rnoh kơp bâh rnâng kan ntĭm leo njrăng rdâng nău tât bâh mih sial n’hanh vơt joi nuĭh rmanh n’gor Gia Lai. Ta aơ lĕ geh âk trong hăn geh dak băm, ƀư tâm nglah êng, n’gâng kan ta ntŭk lĕ ntrơn 24 rnăk ƀon lan. Ndrel đah nĕ, 1500ha ba n’hanh bum mbo bâh ƀon lan lĕ geh dak băm đŏng. Tâm nĕ, ăp ntŭk geh rnoh neh tơm tăm geh dak băm âk ngăn lah Phú Thiện đah 447 ha n’hanh nkuăl Chư Prông đah 368 ha, ăp nkuăl êng kơt lah nkuăl Ia Pa, Chư Pưh n’hanh nkuăl têh Ayun Pa lĕ geh rhiăng ha ba n’hanh bum mbo bâh nuĭh ƀon lan lĕ dak băm. Aƀaơ rnâng kan leo kan njrăng rdâng nău tât bâh mih sial n’hanh vơt joi nuĭh rmanh n’gor Gia Lai n’hanh ăp nkuăl, nkuăl têh way geh mbơh nkoch nău, ntĭm đă ăp mpôl kan ƀư kloh ueh ntŭk gŭ rêh ta ăp ntŭk geh dak băm, lôch dak rhoăt.

Nuĭh rblang: Thị Đoắt