VOV4.M’nông: Kơp tât khay 3 năm 2022, ta Gia Lai, hôm geh bơi tât 170 rbăn ha bri tâm rnoh neh rlau 632 rbăn ha bri ê geh jao ân ăp Rnâng kan, ntŭk kan, nsum mpôl ƀư nau mât njrăng. Nau ngăn aơ nchâp n’gâng kan gưl xã ân geh mât êng bri rnôk ma ăp nŭih, ăp rmôt ê geh đăp mpăn. Nau aơ jêng ăp nau jâk đah nau ƀư kan chính trị êng tâm nkuăl, nau săk tam mât njrăng bri jêng jêr.

            Nô Trần Quốc Châu, 34 năm, tâm ƀon Kla geh UBND xã Ia Mơr, nkuăl Chư Prông ký hợp đồng ƀư nŭih mât bri ân xã ntơm bôk năm 2022. Đah rnoh prăk 6 rkeh/nŭih/khay, nau kan bah nô Châu ndrel 4 cán bộ mât bri mô 1 lah hăn mêt uănh, njrăng nklăp 4000 ha bri. Rnoh neh bri mât âk, pah kan tâm măng, Nar, nau tât khuch jêr yơn mô geh ndơ kơl kan, nau dơi mô geh âk, ri ƀư rmôt mât njrăng bri mâp nau jêr:

            ‘Bu kuăl điện thoại, gĭt hên ntŭk trong hăn, bu đă hên hăn tât ta nê, bu lơh ân khĭt, bu ndjôt payh, ndjôt yeh hăn tât mro. Nŭih tơm ri jao ân hên hăn uănh bri, lah saơ ri sĭt mbơh, mô janh ƀư êng ôh, mbơh tât xã bu đă nŭih hăn rklaih, rmôt kan mât njrăng bri mô dơi geh rklaih ôh”.

            Wa Nguyễn Tuấn Anh, Groi Kruanh UBND xã Ia Mor, nkuăl Chư Prông mbơh, rnoh neh bri chăt êng ndrel neh bri tâm xã rnôk aơ lah 24 rbăn ha. Tâm nê, mhe geh 10 rbăn ha geh jao ân Rnâng kan mât njrăng bri dŏng kan Ia Mơr. Rnoh hôm e, xã mât. Êng 20 nŭih pah kan, xã lŏ ntop rmôt cán bộ, công an, dân quân tự vệ kơl an tâm măng.

Yor aơ lah rnôk ma bri geh rnoh âk ngăn. Wa Nguyễn Tuấn Anh mbơh, ntơm năm 2021 tât rnôk aơ, păng nơm ndrel ma rmôt UBND xã ndrel rmôt mât njrăng bri hŏ geh n’gâng kan ba lơ nkah mhal âk tŏ yor ê dơi njrăng rdâng mât bri:

            ‘Kơt săk gâp aơ, dĭng nar pah kan tâm ngih xã, măng ri kât njal bĭch tâm bri ndrel ma oh nô gay ma njrăng, gay ma tâm dăch, năn klaih lơn. Yơn lah nau jêr ân nkuăl tâm ăp nau kan êng êng đŏng. Kơt lah geh rnôk rgum lĕ tâm nau mât, njrăng bru, ri ăp nau kan êng kơt lah hun hao văng sa, ntĭm mbơh ƀon lan hun hao nau kan tuch tăm ri mô geh âk”.

            Nau kan mô blau ma ƀư êng, nê kŏ lah nau ngăn dôl geh tâm UBND xã H’Bông, nkuăl Chư Sê. Wa Bùi Văn Cường, Groi Kruanh UBND xã H’Bông mbơh, nklang năm 2019, rnôk Rnâng kan mât njrăng bri Ayun pa geh nsrŭng nau kan, nkuăl geh jao rlau 3.800 ha bri, tâm nê geh rlau 2.100 ha lah bri njrăng rdâng. Kŏ ntơm bah nê tât rnôk aơ, nau kan lơh khuch bri ta aơ geh mro, đah nau lơh khuch ntơm bah bar pe ha ân tât bar pe jêt ha. Knŭng êng ê tŏng du năm, ntơm khay 9 năm 2021 tât rnôk bôk khay 7/2022, bri tâm 15 lô, bah 4 khoảnh tâm ăp tiểu khu 1.064 ndrel 1.065 hĭ geh bu ntŭng kăl, uih lĕ. Tâm rnoh aơ, geh 23,5 ha hŏ geh bu tăm bạch đàn, rnôk ma tơm hŏ chăt rlau du n’am mơ tơm mât njrăng bri dĭng saơ. Wa Bùi Văn Cường, mbơh:

            ‘Rnôk geh xã H’Bông ndơn neh mât njrăng bri aơ ri geh âk nau jêr hăn rlet ngăn tâm trong dak me, mô lah 2 nkuăl Phú Thiện, Ia Pa, n’ăo ma hăn, sĭt ri nklăp 100 km”.

            Wa Thái Thượng Hải-Kruanh ntŭk kan mât njrăng bri nkuăl Chư Sê, mbơh, rmôt khân păng âk tŏ râng nau kơl mbơh nchră ân UBND nkuăl Chư Sê ƀư săm ƀŭt đă UBND n’gor Gia Lai jao bri, yơn ê geh nau dơi ngăn:

            ‘Bah ăp rnôk geh nau tih ndrel ăp nau kan mât njrăng hôm geh nau ntoh luh, ri ma năm 2021, rmôt kan mât njrăng bri bah nkuăl njoăl săm ƀŭt mbơh tât N’gâng kan tuch tăm ndrel hun hao ƀon lan mbơh UBND n’gor ân jao rnih neh aơ ân Rnâng kan mât njrăng bri Ayun Pa mât, yor khân păng geh nŭih kan, geh prặk, ri mra ueh lơn. Bôk năm 2022 kŏ ƀư du tơ̆ tay đŏng”.

            Đah rlau 632 rbăn ha, rnôk aơ, Gia Lai lah n’gor geh rnoh neh bri têh tal 4 lam dak ndrel têh ngăn rnôk aơ tâm 5 n’gor Tây Nguyên. Rơh rlau aơ, rnoh neh bri chăt êng bah n’gor hôm geh n’huch, rnoh geh nkŭm n’hâm bri dêh lơn nau geh nsum bah lam nkuăl. Rnôk năm 2015-2020, tâm n’gor geh rlau 4.300 tơ̆ tih đah âk rhiăng ha bri geh kăl, lơh.

            Wa Nguyễn Văn Hoan-Groi Giám đốc N’gâng kan tuch tăm ndrel hun hao ƀon lan n’gor Gia Lai mbơh, du gưl tâm nkô̆ nau ăp xã jêr rdâng bri, lah yor neh bri geh jao tâm pleh đah neh tuch tăm bah ƀon lan. Gay nau mât njrăng bri geh ueh lơn, ân geh jao ân ăp rmôt kan mô lah ƀon lan kơt nau ntrŭnh bah Luật mât njrăng bri. Yơn lah, nau kan aơ geh tât âk nkô̆, kơt tơm prăk, nau ueh. Wa Hoan ŭch, dĭng lĕ neh bri tâm n’gor mra geh jao ân tâm di nŭih ndrel tâm di nau nchrăp tât năm 2030:

            ‘Rnôk aơ, Gia Lai hôm rnoh neh bri âk oi, ê geh jao ân ăp tơm mât njrăng. Nau mĭn bah ntŭk kan tuch tăm ndrel ntŭk kan mât njrăng bri lah aơ rnoh neh bri ân geh jao ân tơm mât njrăng, nsôih tât năm 2030, dĭng lĕ rnoh ney bri aơ ân geh jao ân tơm mât njrăng bri mât”.

            Tâm rnôk kâp geh tơm bri, UBND ăp xã tâm ntŭk geh bri ê geh dơi jao hôm geh vĭ vĕ ơm đah nau kan dôl geh ƀư rnôk aơ./.

                        Nŭih rblang: H’Thi