VOV4.M'nông: Ôi 7/7, 5 nuĭh tâm rmôt druh ndăm rchong ta ƀon Kloong, xã Ia O, nkuâl Ia Grai, n'gor Gia Lai geh tăch tât Campuchia hŏ dơi kơl sĭt, plơ̆ n'gor Gia Lai đăp mpăn.  Đại tá Trần Thanh Bình- Groi Chỉ huy trưởng Tahen n'har bri n'gor Gia Lai an gĭt, 5 nuĭh geh bu rlăm dja lah Puih Đại (deh năm 1998), Puih Môi (deh năm 2004), Ksor Jối (deh năm 2004), Puih Chiêu (deh năm 2003), Ksor Gum (deh năm  1999). 

Rmôt druh ndăm ndrel Kpuih Thái (deh năm 1994) n'hanh Kpuih Phú (deh năm 2006) dơi kơl sĭt rnôk 3/7 n'hanh 4/7 mhe aơ geh nuĭh rlăm Trần Quang Quyết (deh năm 2001, gŭ ta xã Ia Dal, nkuâl Ia Hdrai, n'gor Kon Tum) rlăm tăch Campuchia tâm 2 nar 20 n'hanh 21/6/2022 mhe aơ. Nar 5/7 mhe aơ, Pôih n'har bri Ia O (Tahen n'har bri n'gor Gia Lai) hŏ lah phong nuĭh tih tăch rvăt nuĭh, nkre ndơ̆ jao nuĭh tih Trần Quang Quyết an Nhih pah kan ôp ŭanh nău tih Công an n'gor Gia Lai ôp uănh, ƀư kloh tay tĭng nău dơi kan./.

Nuĭh rblang: Điểu Thân