Nău rvê mpeh rơh pĭch rlâm yor phŭt mrô 13 dŭt năm 2025 hôm e nkân. Hang rbăn mét khối neh lĕ bah yôk Phương Mai jŭr bŭl 3 rnăk jay, ƀư du hê khĭt, du hê sôt rmanh n’hanh âk rnăk ƀon lan an trơn ndal. Wa Lê Văn Phụng, nuĭh ƀon lan khu phố 9, phường Quy Nhơn mpŏng kâp, ndơ ƀư mpir nking njrăng pĭch rlâm mbra jêng "n’ha nking" mât njrăng nkual ƀon lan gŭ bah năp ăp nu nău trôk nar tăch gưl.

Ŭch ngăn yor yan mih phŭt êp tât hôm. Lah ƀư mô ngăch ri yan mih mbra mâp âk jêr jŏt. Nuĭh ƀon lan mpŏng ngih dak jêh ndơ ƀư nâp nâl an nuĭh ƀon lan đăp mpăn.

Jêh rnôk dơi mbơh tơm prăk, UBND phường Quy Nhơn mbơh ƀư nău nchrăp ndâk ƀư mpir nking nkra pĭch rlâm yôk ta Hải Minh rlău ma đah dĭng lĕ rnoh ntuh kơl rlău 10,2 rmen prăk. Ndơ ƀư geh mpir nking yôk 65 mét, prêh 4 mét, ntop đah trong rbông n’hoch dak bah jâng yôk luh dak lêng gay n’hŭch jâk trong dak hoch n’hanh klach pĭch rlâm tâm yan mih. Wa Nguyễn Quốc Hùng, ntoh măt ntŭk kan ndâk ƀư, an gĭt, gay đăp mpăn ngăch, nuĭh ndranh rgŏ jă ƀa ƀơ nklăp 20 phung pah kan ndrel âk măy mŏk, rdâk ƀư na nao.

Lŭ choih bah dak lêng hăn tât ndrâm gay njưh, tâm rnôk rdêng lăp kơh rgum ri dŭt âk trong jêt jêng nuĭh ndranh lĕ ntop hăn dŭt âk ndeh ntrôl i ty, rdêng măng nar gay geh lŭ choih gay ngăch ƀư, ndâk nkra mpir nking gay ơm jêh ndơ ƀư.

Năm 2026, n’gor Gia Lai kơl lor prăk ntuh kơl an ăp ndơ ƀư njrăng n’gang nkra nău khuch trôk nar lơh ta âk ntŭk. Êng phường Quy Nhơn dơi pă rlău 52,7 rmen prăk gay nkra, ndâk ƀư ăp ndơ geh khuch yor trôk nar lơh lĕ jêh 5 ndơ ƀư ngih samƀŭt, ngih pah kan khu phố n’hanh ngih pah kan. Tâm nĕ, nău nchrăp ƀư mpir nking njrăng pĭch rlâm ta Hải Minh rlău ma dơi năl lah ndơ ƀư khlay an jêh bah năp yan mih gay mât njrăng nkual ƀon lan gŭ bah dâng jâng yôk Phương Mai. Tĭng wa Nguyễn Đức Toàn, Kruanh UBND phường Quy Nhơn, ndơ ƀư lĕ geh nklăp 80% rnoh ndơ ƀư. N’gâng kan ƀon lan ta ntŭk dôl tâm rgop đah ntŭk kan ndâk ƀư rgum dŭt n’hâm nuĭh kan, ndeh rklư gay jêh di trong nchrăp.

Ntŭk kan ndâk ƀư lĕ rgum ăp rmôt nuĭh, ăp ndeh rklư, măy mŏk n’hanh ndoh ndơ gay ntrôl ngăch mbơh ƀư nău nchrăp kan. Tât aƀaơ ngăch ndâk ƀư lĕ geh nklăp 80% rnoh ndơ. UBND phường lĕ ntĭm rđău ntrôl ngăch jêh gay bah năp yan mih phŭt ndơ ƀư aơ an jêh, đăp mpăn đah drăp ndơ n’hanh nău rêh an nuĭh ƀon lan.

Đah dŭt n’hâm jêh bah năp yan mih, ndơ ƀư mô knŭng nkra khuch khat trôk nar lơh ma hôm rgop mât njrăng đăp mpăn nău rêh, drăp ndơ bah nuĭh ƀon lan bah dâng jâng yôk Phương Mai, kơl kônh wa ta phường Quy Nhơn, n’gor Gia Lai đăp mpăn nău rêh bah năp ăp nu nău trôk nar hô nar hô tăch gưl.