UBND n’gor Gia Lai mhe an ƀư trong nchrăp ƀư ntơm ƀư n’hanh sa nkra âk ndơ ƀư, nău nchrăp ƀư khlay, ngăn ngên mbah rhơn nkah gĭt 80 năm Cách mạng Khay 8 n’hanh Quốc khánh dak Cộng hòa xã hội chủ nghĩa Việt Nam (2/9/1945-2/9/2025). Tĭng trong nchrăp, ôi 19/8, n’gor Gia Lai ntơm ƀư nău nchrăp ƀư ntuh kơl ndâk ƀư trong jŭr mrô 2 n’hanh ăp ndơ ƀư rĭng tâm ban ta nkual mpăr tach ndeh păr Phù Cát.

Ndơ ƀư geh dĭng lĕ rnoh ntuh kơl rlău 3.200 rmen prăk, ƀư tĭng bah năm 2025 tât 2028 gay n’hao dơi dŏng, tâm di nău ŭch rhŏ ndeh păr rơh mhe, nta an hun hao wăng sa-rêh jêng nkual. Ndrel nar, n’gor Gia Lai mbra sa nkra Trong dêr mpeh Bah dâng nkuăl têh Phú Phong (aƀaơ lah xă Tây Sơn) jong 18 km, prăk ntuh kơl bơi 800 rmen prăk, ntơm ƀư khay 8/2022; sa nkra Trong boăt nthoi Tỉnh lộ 638 tât trong mper dak lêng (ĐT.639), jong rlău 19 km, dĭng lĕ prăk rlău 800 rmen prăk. 2 nău nchrăp ƀư aơ kơl n’hŭch jâk an Quốc lộ 19, rhoăt nar rdêng ndoh ndơ, ntrôl boăt nthoi nkual, hun hao pâl nđaih; nkre rgop mât njrăng ngih wâl, drăp ndơ bah nuĭh ƀon lan tâm yan mih phŭt sial.