Kơp tât bôk khay 6/2026, ntŭk nchrăp ƀư Nhih nti Phổ thông nội trú rep gưl Tiểu học n’hanh THCS ta 7 xã n’har bri mpeh Nhâp nar n’gor Gia Lai hŏ lôch jêh nklăp 50% rnoh âk ndơ ƀư. Yơn lah, lĕ 7 nhih nti aƀaơ nha hôm mbrơi ntơm bah 15 tât 52 nar rđĭl đah trong nchrăp đŏng.

Ban Mât uănh ăp trong nchrăp ntuh kơl rdâk njêng n’gor Gia Lai đă, ntơm bah aơ tât lĕ 30/8, ăp đơn vị râng nar kan, rgum lĕ tơm ndơ, ra uănh tay rnoh ngăch tĭng gâl kan, kơi ntop nuĭh kan, ndeh rklư n’hanh leo rdâk ƀư mbro gay đăp mpăn wat jêh nhih nti. Ăp nuĭh tơm mbơh nti, groi nđôi ân way grêt dăch ntŭk ƀư, kơp uănh lhăt nâp uĕh, đăp mpăn nuĭh kan, mô njău ma ndăn ngăch ƀư ma khuch tât nâp uĕh nhih nti. Wa Phạm Xuân Điệp, Kruanh Ban mât uănh ăp ntŭk nchrăp ntuh kơl rdâk njêng n’gor Gia Lai an gĭt:

"Geh 2 nău kan dŭt khlay lah nkra bah ăp jêr jŏt wăk kol bah nuĭh tơm ndranh ta ntŭk rdâk ƀư nhih nti, gay nuĭh tơm ndranh an ƀư dơh ngăch lơn. Tâl bar lah mbra kan nsum đah ăp n’gâng kan tâm dâng, ăp ntŭk n’hanh ăp nuĭh tơm ƀư ndranh gay ntop rgum tay tơm ndơ gay n’hao âk nuĭh ntop kơl an nuĭh tơm ƀư ndranh”.

Ta rơh rgŏ jă, nuĭh tơm ntuh kơl, nuĭh mbơh nti groi nđôi n’hanh ăp nuĭh tơm ƀư ndranh hŏ ký ton rnoh ngăch, nâp uĕh n’hanh mô geh nău tât rmoh rmanh nuĭh kan, nsrôih ƀư lôch jêh nhih nti di nău rđău đă bah Bộ Chính trị, Chính phủ n’hanh UBND n’gor Gia Lai. Wa Trần Bảo, Groi Tổng Giám đốc Công ty TNHH Ntuh kơl Rdâk njêng Dacinco, nuĭh tơm rdâk ƀư Nhih nti Phổ thông nội trú rep gưl Tiểu học n’hanh THCS Ia Dom rblang ơh bah ntŭk kan:

“Trôk nar aƀaơ, ăp nar mih ntơm bah 2 tât 3 tơ̆ đŏng. Mpôl hên nchrăp dĭl geh 5 tât 6 trong nkra ƀư. Bôk năp lah n’hao âk nuĭh kan, aƀaơ ăp ntŭk nhih nti, mpôl hên geh 320 nuĭh kan. Tâl bar ân n’hao âk nuĭh tâm pleh mpôl kan mbro, 2 tât 3 tơ̆ pleh/măng. Trôk mih, mpôl hên mbra geh trong tâm pleh gay trok tay. Nkre n’hao âk kỹ sư groi nđôi gay đăp mpăn nâp uĕh bah nhih nti”

Trong nchrăp ƀư Nhih nti Phổ thông nội trú rep gưl Tiểu học n’hanh THCS ta n’gor Gia Lai geh lĕ rngôch tơm prăk ntuh kơl rlău 1.516 rmen prăk, dơi an ƀư ta 7 xã n’har bri lah Ia Mơ, Ia Púch, Ia Pnôn, Ia Nan, Ia Dom, Ia Chía n’hanh Ia O. Rnôk wat jêh, nchrăp mbra rhŏ dŏng rlău 7.000 kon se nti đah jrô nti, ký túc xá, jay sông sa, nkual nai ntĭm n’hanh ăp ndơ ntop dŏng ăp kôp. Nhih nti geh nkô̆ hôr khlay tâm nău n’hao săk blău ntĭm nti ta nkual n’har bri bah n’gor Gia Lai.