VOV4.M’nông- Ôi nar 27/7, ta nkuăl ƀon têh Pleiku, UBND n’gor Gia Lai ƀư rơh rƀŭn nchră tâm mâp ăp nuĭh geh kan đah cách mạng ntoh lư di nar kahgĭt 75 năm nar tahen sôt rmanh, tahen khĭt tâm lơh kăl e. Râng rơh tâm mâp rơh aơ geh 75 đại biểu, geh 2 hê nuĭh mê̆ Việt Nam anh hùng, 1 hê anh hùng lực lượng vũ trang ndrel đah ăp tahen sôt rmanh, nuĭh rnăk vâl tahen khĭt tâm lơh kăl e ndơn kan an rlău 12 rbăn nuĭh geh dơn nău kơl an nuĭh geh kan đah ngih dak ta Gia Lai.

Ta rơh tâm mâp, ăp đại biểu lĕ ndrel nkah tay nău way ueh ơm têh khlăy bâh mpôl rnoi bâh ăp rơh tâm lơh. Nuĭh leo kan n’gor Gia Lai mpơl nău lah ueh n’hanh kahgĭt tât ăp rnăk dơi kơl, nuĭh geh kan đah cách mạng. Bâh năm 2017 tât aƀaơ, Gia Lai lĕ kơl nkra mhe an rlău 2 rbăn mblâm ngih jay an nuĭh geh kan hôm nha geh nău jêr jŏt, đah rlău 73 rmen prăk. Ntŭk kan mât kơl an rlău 20 rbăn nuĭh geh kan đah rnoh prăk rlău 22 rmen prăk. Geh 14 nuĭh mê̆ Việt Nam anh hùng hôm nha rêh geh ƀư jay tâm rnglăp n’hanh geh ăp ntŭk kan, n’gâng kan dơn mât lĕ nău rêh.

Nuĭh rblang: Thị Đoắt