VOV4.M’nông: Di nkah 75 năm nar tahen sôt rmanh, tahen khĭt, lơ 25/7, rmôt hăn kan bah Quốc hội yor Thượng tướng Trần Quang Phương, Groi Kruanh Quốc hội ƀư Kruanh rmôt hŏ tât khâl, pă nklâm ndơ ân du đê̆ rnăk geh dơi kơl, nŭih geh n’hâm ma cách mạng ta Lâm Đồng.

Tâm ăp ntŭk tât khâl, Groi Kruanh Quốc hội Trần Quang Phương hŏ ôp khâl n’hâm soan, nau rêh bah ăp nŭih rđau kan, nŭih băl mpôl rnăk vâl geh n’hâm ndrel ăp nŭih tahen ơm. Nkre lah, ntoh nau lah ueh ngăn tât ăp nau rgop bah ăp kơn hăn lor tâm nau kan ndâk njêng ndrel mât neh dak.

Groi Kruanh Quốc hội hŏ njoăl nau rhơn tât ăp đồng chí, băl mpôl tahen khĭt lŏ rêh ân ueh, n’hâm soan dăng, mât ndrel ƀư ueh nau vay ơm cách mạng bah rnăk vâl, mro lah nŭih leo ang ân ăp rơh kon sau kơt tĭng. Bah năp nê, Thượng tướng Trần Quang Phương ndrel rmôt hăn kan hŏ tât leo nkao, mpoh kthup nkah ăp tahen khĭt tâm môch tâp Đà Lạt./.

Nŭih rblang: H’Thi