VOV4.M’nông: Tâm ntŭk kan Chính phủ, Groi Thủ tướng Lê Văn Thành ƀư tơm nar rƀŭn trực tuyến Rnâng kan rđau kan Chính phủ ntrŭnh ƀư Bôk nau kan ndâk ntŭk trong hăn ngăch Bắc-Nam mpeh ba dâng. Lôch nar rƀŭn, Groi Thủ tướng Lê Văn Thành lah rjăp: Nau ntrŭnh Đại hội 13 ndŏ luh nau kan nsôih ntơm rnôk aơ tâm năm 2025 ân ƀư jêh 2000 km trong hăn. Gay dơi nau aơ, Quốc hội hŏ ntrŭnh nau đah âk nau dơi, pơk trong npơih ueh ngăn gay ma ntrŭnh ƀư.

Groi Thủ tướng lah rjăp, tât năm 2025 ƀư jêh nkô̆ nau ndâk tay 2000km trong hăn tĭng nau nchrăp. Groi Thủ tướng đă N’gâng kan gung trong nchuăn rdeng ngăch ƀư nau kan gay ma săch tơm ntuh kơl, ndâk nkra 729 km trong bah năp lơ 31/12, ndal ƀư nau ntrŭnh jao ân ăp nkuăl lah tơm ntuh kơl ntrơn ntŭk nkra trong, pă năn tơm prăk gay ma đăp mpăn tât lơ 31/12 ân ntrơn jêh 70% ntŭk ŭch nkra trong./.

Nŭih rblang: H’Thi