Ôi 26/5, Groi Thủ tướng Rnâng kan Nguyễn Hòa Bình hŏ râng n’hanh geh nău lah ntơm pơk Đại hội Đại biểu Đảng bộ Tập đoàn Bưu chính Viễn thông Việt Nam (VNPT) tâl 25, năm kan 2025–2030. Groi Thủ tướng nchih nkah ăp nău rgop ntoh lư bah VNPT tâm năm kan rlău aơ, lơn  lah nău khlay kan tơm tâm nău an ƀư Chính phủ điện tử, rgâl mbrô gưl neh dak n’hanh mât njrăng ƀư tơm ta trôm mạng.

 Bol tâm rdâng đah âk jêr jŏt ntul rlong tâm dak n’hanh dak bah dih, VNPT nha hôm năl di ntŭk khlay kan viễn thông, công nghệ. Groi Thủ tướng Nguyễn Hòa Bình dăn đă Đảng bộ VNPT ntik n’hao tay nuih n’hâm rgâl mhe, ntrôl dăng gŭ mĭn, ƀư tơm khoa học công nghệ, mbluh soih tơm ndơ gay njêng suan ntrôl hun hao đăt ndal. VNPT ân dâk leo lor tâm trong tĭng ƀư Nghị quyết 57 bah Bộ Chính trị mpeh hun hao khoa học, công nghệ n’hanh rgâl mbrô gưl neh dak.