1 khay bah năp, ta dôr yôk ta thôn 16/5, xă Đăk Pék, n’gor Quảng Ngãi, âk cán bộ, tahen ndrel rmôt druh ndăm n’hanh nuĭh ƀon lan an kuih tĭng gưl neh. Nău kan dơi ƀư tĭng i jâng ty ta n’gul yôk, neh lŭ chreh n’hanh ăp rơh mih na nao.

Lơ 29/9, rmôt tahen saơ nting tahen bôk năp ta nkual dôr yôk mpeh bah dâng Nghĩa trang Liệt sĩ Đăk Glei, ta thôn 16/5. Nting tahen gŭ tâm trôm n’gar nghĩa trang, ta rnoh jru nklăp 80cm, dơi put đah njao n’hanh gŭ nkăng dôr yôk. Tât nar 10/8, ta nkual aơ 10 nting tahen dơi rgum. Ndrel đah nting lah âk ndơ kơt ntô jôt, bình tông, rse bŭt, mbang ao; du đêt dơi tâp tâm tăng, ao mih mô lah njao.

Ngoăy tâm âk nuĭh mbơh nău an rmôt kan dơi kan lah wa Bùi Đình Lai, tahen ơm ta thôn 16/5. Wa bah n’gor Quảng Ngãi (ơm) hăn nkual neh aơ bah năm 1980 n’hanh geh rlău 40 năm tĭng đah Đắk Pék. Nklăp năm 2000, tâm năm ƀư trong Hồ Chí Minh, nkual ƀon lan mper trong geh sŏk, wa Lai trơn hăn nkual jay mât uănh môch, Nghĩa trang Liệt sĩ Đăk Glei gŭ rêh. Ta aơ, wa tă saơ âk têl ntô lah môch tahen, du đêt ntŭk hôm ư păng tăng, ao mih bah tahen. Yor mô geh ndơ uănh nđôi, năl saơ, wa nkah gĭt ăp ntŭk aơ.

Rlău 20 năm bah kơi, rnôk ƀon lan mbơh ƀư “Nău kan 500 ntrôl dăng ƀư tĭng joi, rgum n’hanh năl săk tahen khĭt kăl e”, ăp nău nkah gĭt nĕ dơi wa Bùi Đình Lai mbơh an rmôt tahen ta ntŭk: “Mhe rlău, tâm bôk nău kan nkah gĭt tahen khĭt kăl e 500 ntrôl dăng, oh nô geh ôp ri gâp ntĭm, năl nĕ lah tahen khĭt kăl e ri djôt sĭt nghĩa trang. Jêh nĕ ntơm năl gay joi rnăk wâl. Lah geh nuĭh bên ri khân pơng tât dơn, kơt nĕ lah hôm ueh”.

Mô knŭng wa Lai, âk tahen ơm tă plơ̆ sĭt ntŭk tâm lơh Đăk Pék mbơh nu nău đŏng mpeh ăp rơh tâm lơh hôm ta aơ năm 1972. Tĭng ăp nău nkoch geh tahen đặc công, n’hanh tahen Sư đoàn 320 lĕ khĭt. Du đêt nuĭh dơi ƀon lan ta ntŭk tâp jêh tâm lơh tâm su.

Tahen ơm Trần Duy Liễu an gĭt: Tâm năm râng ndâk njêng nkual Nghĩa trang Liệt Sĩ nklăp năm 1988-1990, wa tă saơ du nting geh tâl tâm tăng njao, geh rse tahen. Rnôk nĕ, yor mô gĭt mbơh an ngih pah kan, wa trơn nting nklăp 15 mét jêh nĕ tâp tay. Rnôk gĭt ƀon lan mbơh “Nău kan 500 nar măng”, wa Liễu mbơh an Ban ntĭm rđău Tahen xă n’hanh na nê̆ nchoeng n’gang ntŭk ntôn saơ. Ta nkual aơ, rmôt tahen mô joi saơ nting wa tă trơn, yơn saơ du nting tahen êng. Nău mbơh na nê̆ dơi ndơ̆ tâm rnôk joi, năl ăp nkual kiău ma.

Trung tá Nông Việt Dũng, Ban Ntĭm rđău tahen xă Đăk Pék an gĭt, bah bôk năp nău kan, xă ndâk njêng trong nchrăp, trong ƀư rmôt tahen, ndeh rklư. Tơm nău mbơh yor tahen ơm n’hanh nuĭh ƀon lan dơi wơt dơn, uănh năl, nchoeng n’gang lor rnôk ƀư joi. “Ăp ntŭk môch dơi tâp ri geh môch tâm ƀah 1 mét, geh môch ƀah tât 2 mét, tĭng dăp hăn hao bah dôr yôk. Jêh rnôk kuih joi taen bôk năp ta xă, nĕ lah du nău răm, nău rhơn bah cán bộ, tahen Ban ntĭm rđău Tahen xă tâm rnôk joi, rgum. Mpôl hên saơ dŭt n’hâm răm rnôk nău kan nơm ƀư lĕ dơi nkah gĭt đah ăp tahen khĭt kăl e lĕ tâm lơh, khĭt ta nkual neh aơ”.

Nău joi ƀư tâm trôk nar mô ueh. Bah lơ 29/7 tât lơ 10/8, nkual Đăk Pék geh nklăp 6 nar mih. Cán bộ, tahen an kăt ƀăih, dŏng ao mih, njao gay mât njrăng nkual kuih joi. Jêh rnôk kuih, ăp nting dơi djôt sĭt jay kâp mât prăp. N’gâng kan ntĭm rđău Tahen n’gor Quảng Ngãi sŏk ntting ADN đah 10 nting tahen gay rhŏ an năl săk.

Lơ 14/8, 10 nting tahen khĭt dơi tâp ta Nghiã trang Liệt sĩ Đăk Glei. Rnôk mpôl ndơ̆ ăp nô sĭt ntŭk gŭ, âk ƀon lan ta ntŭk dâk 2 đah trong, djôt cờ nkao njŭn tâp. Thượng tá Blong Nhâm, Chỉ huy trưởng Ban ntĭm rđău tahen xă Đăk Pék, an gĭt, ƀon lan hôm 5 ntŭk lĕ dơi năl joi tay nting tahen khĭt kăl e.

“Mpôl hên hôm 5 ntŭk tĭng tọa độ bah Ban Ntĭm rđău 515 n’hanh tọa độ yor ăp tahen ơm mbơh jêh rnôk hăn uănh ta ăp ntŭk. Aƀaơ, mpôl hên lĕ uănh joi bom mìn ta lĕ rngôch ăp ntŭk. Tâm rnôk ƀư tĭng trôk nar mih sial mrô jêng trong kan ƀư mâp âk jêr jŏt. Mbơh ƀư tay du trong dŭt n’hâm lơn tay, rgum tâm ăp ntŭk mhe aơ Ban Ntĭm rđău 515 lĕ ƀư hăn uănh na nê̆ ta ntŭk”.

Aƀaơ, xă Đăk Pék rgŏ jă tay nuĭh ƀon lan, tahen ơm n’hanh nuĭh saơ kăl e mbơh tay nu nău mpeh ăp nkual ntôn geh môch, nting tahen khĭt kăl e. Ăp nău mbơh mhe mbra dơi năl, uănh n’hanh nchoeng n’gang nkual gay rhŏ joi. Rlău n’gul rach năm bah năp, ăp lôk bri, trong hăn, mir ba ta Đăk Pék lĕ âk rơh rgâl. Nău ơm bah ăp nuĭh saơ n’hanh têl n’glen tâm neh lah ăp nău saơ khlay. Mpeh bah năp hôm e âk ntŭk an hăn uănh, ăp nău nkoch mô hŏ dơi rblang n’hanh ăp rnăk hôm dôl kâp nău mbơh jêh rlău âk năm. Wa Lê Viết Nam, Bí thư Đảng ủy xă Đăk Pék, n’gor Quảng Ngãi nkoch nău dŭt n’hâm. “Lah geh ăp ntil nău mbơh ri lĕ rngôch Ban ntĭm rđău kơt ăp ngih pah kan dơi kan, lơn lah rmôt way kan, an gŭ rblang, uănh lah na nê̆ n’hanh geh trong ƀư, nău nchrăp gay joi. Nuih n’hâm lah dŭt n’hâm joi moh ntŭk ri an na nê̆,nchoeng n’gang n’hanh ƀư mô vih du ntŭk ri mư dơi joi”.