Nklang nar duh n’heng kêng dŭt khay 6, ta ntŭk tăm tao thôn Thanh Minh, xã Suối Trai, n’gor Dak Lak rlău 2ha tao bah wa Ale Văn Đăng, 77 năm deh hŏ lôch sreh rlău 1 pơh hôm an nar sa dơm ta mir đŏng. Lôch rlău 1 pơh sreh, rnoh tao hŏ geh kro lĕ dak rlău 1/3. Wa Ale Văn Đăng rvê:

"Sreh hŏ 10 nar ma mô geh ndeh aơ. Kuăl điện an ntŭk rvăt ri ntŭk rvăt mô geh ndeh, nhih máy khuch. Gâp pha lah uănh dơm. Kon gâp kuăl điện mô gĭt dah âk tơ̆ hôm, kon gâp kuăl điện tât xã đŏng. Aƀaơ păng kro lĕ hôm, ntŭk hôm geh ndơ."

Njok trong Quốc lộ 19C gâl hăn rlău ăp xã Suối Trai, Sơn Hòa, Vân Hòa... mô jêr mâp ăp mbŭch tao hŏ lôch sreh kro tâm ban ma rhe. Ta âk mir tao êng, tơm tao hŏ rlău khay sreh 3 khay nha hôm dâk kro ta mir đŏng, mô gĭt dah jŏ mơ dĭng tâm pă nar đă sreh. Nuĭh tăm tao an gĭt, mô hŏ tă geh nuĭh tăm tao mâp kơt nău dja:

"Ri nê̆ djăt ma sreh chôt kro tâm ban kơt he wâr păng dơm. Aƀaơ lah an dâk kro kơt nê mbro ma tât aƀaơ mô hŏ sreh, ƀon lan gĭt ntŭk ma ôp?"

Nău ngăn geh dja lah nău geh nsum bah lĕ rngôch dŭt âk nuĭh ƀon lan tăm tao ta ăp nkual mpeh luh nar n’gor Dak Lak đŏng. Nchih rgum mô hŏ ăp tŏng, tât kêng dŭt khay 6, êng ta nkual tăm tao mpeh nkuâl Sơn Hòa ơm...geh dŭt đêt 6000 ha tao mô hŏ dơi sreh, âk ntơm bah 10-12% rnoh hvi neh tăm tao (uănh tĭng xã). Ntĭt kơt ta xã Sơn Hòa, ntŭk geh neh tăm tao dŭt hvi bah n’gor Dak Lak đah rlău 8.000 ha, tât aƀaơ hŏ sreh geh rlău 7100ha, hôm bơi 950 ha mô hŏ sreh ơm. N’gâng kan ta ntŭk hŏ pah kan đah nhih máy đường KCP ntoch jong khay et n’hanh rvăt lĕ tao an ƀon lan đŏng. Wa Nguyễn Duy Tình, Groi kruanh UBND xã Sơn Hòa, n’gor Dak Lak, an gĭt:

"Bah năp nău ngăn geh dja UBND xã hŏ pah kan na nê̆ đah Ban Giám đốc công ty nhih máy đường KCP gay mhâm ƀư ntơm bah aơ tât kêng dŭt khay 7 năm 2026 mbra sreh lĕ rngôch tao an kônh wa gay der bah roh huach. Rnôk sreh mbrơi ri mbra ƀư hŭch săk geh an khay tăm bah kơi tay."

Khay sreh tao năm aơ, nuĭh tăm tao Dak Lak ât rdâng đah âk mpưm jêr jŏt: mih dak bŭk lơh khuch nklang khay tăm; rnoh đường tăch mbrơi rđĭl đah đường rvăt n’glăp ntŭng; duh phang ntoch jong lơh rlău 1.000 ha geh ŭnh sa n’hanh tât kêng dŭt khay sreh hang rbăn ha tao nha hôm kâp sreh ta mir đŏng…tâm rnôk nuĭh sreh mô geh n’hanh hao khlay tĭng nar, ntơm bah 28-30 rkeh prăk an 100 tấn tao...Du năm tăm tao tăng đah nuĭh ƀon lan tăm tao mpeh luh nar n’gor Dak Lak.