Nklang bri duh n’heng bah khay 7 ta nkual neh Đồng Xuân, mpeh luh nar n’gor Dak Lak, bơi 30 cán bộ, tahen Bộ Chỉ huy Quân sự n’gor, mpôl dân quân ndrel ăp bác sĩ pháp y hôm rŭ hôch pah kan bah meng ăp ntŭl môch tahen ơm khĭt mô hŏ năl săk ta Nghĩa trang Liệt sĩ Xuân Quang 2. Ndrel du rnôk dja đŏng, du rmôt pah kan êng an joi joi nting uănh năl ta Nghĩa trang Liệt sĩ La Hai. Ăp ntŭl môch dơi pơk ma lĕ rngôch ăp nău ƀư ndê na nê̆, n’guh mbah, yor lĕ dĭng nuĭh gĭt lah, djăt ma hôm geh du ntil ADN hôm dơi mât ndray mbra pơk luh du nău mpŏng nsĭt nuĭh kon bah neh dak sĭt đah rnăk wâl lôch âk rach năm.

Đah Trung tá Lê Nam Ninh, Nuĭh ntop kơl Ban Chính sách, Jrô kan Chính trị, Bộ Chỉ huy Quân sự n’gor Dak Lak, hăn pah kan rơh dja geh nkô̆ hôr khlay mha êng. Bah meng nău kan dơi jao, nô hôm nsĭt tât nău mpŏng âk năm bah rnăk wâl, joi tay môch I che mpeh me hŏ roh ta rơh tâm lơh, lah nău mpŏng kêng dŭt nău rêh bah mê̆ he nơm đŏng. Trung tá Lê Nam Ninh mpơl nău:

"Oh nô tâm rmôt đăm jru, jao nău kan an tĭng đội viên gay ntik n’hao lĕ nuih n’hâm dơn kan. Ƀư lĕ nău dơn kan tâm rŏng mhe ăp tŏng. Săk gâp nơmi, tĭng ƀư trong kan rơh dja mpŏng joi saơ che mpeh me bah he nơm đŏng."

Aƀaơ, ta 34 nghĩa trang liệt sĩ ta n’gor Dak Lak, hôm rlău 4.100 môch mô hŏ năl săk đŏng. Tâm ban đah hang rbăn rnăk mpŏng kâp du nar gĭt năl ntŭk tâp bah nuĭh he đŏng. Nău mpŏng kâp nê hŏ ntop kơl tay suan ntrôl gay ăp cán bộ, tahen n’hanh rmôt way blău kan mô plơ̆ rŭch, bol mih n’hach mô lah nar rlu.

Yơn lah, njăr trong hăn joi tay săk an ăp nô mô di dơh da dê đŏng. Lôch âk năm, âk môch dơn hôm neh choih dơm, ntêl nting mô hôm jêng mô dơi sŏk dơi ntil nting gay uănh năl ADN.

Ta Nghĩa trang Liệt sĩ La Hai, mpôl pah kan kuaih 27 môch yơn dơn geh 6 môch tŏng nău dơi sŏk ntil dơm, hôm 21 môch mô hôm tŏng nău dơi gay rgum ndơ uănh năl. Nău nê tâm ban đah nău hôm âk tahen ơm khĭt mô hŏ dơi năl săk.

Bác sĩ Hồ Kim Thi, Trung tâm Pháp y n’gor Dak Lak an gĭt, gay tĭng ntil nting tahen ơm khĭt rgum joi geh dơi tŏng uănh năl ADN, ăp rêng dơi ƀư lhăt.

"Tâm rêng uănh năl nting ƀư ndê na nê̆, mô an geh sŏk tâm wĭ nuĭh tơm ƀư uănh năl, mô an tâm ntưp wĭ ntil nting nê. Yor nău sŏk ntil nting uănh năl hŏ dŭt jêr hôm jêng ân ƀư ndê na nê̆. Mpŏng joi tay săk ntơ an ăp tahen ơm hŏ roh.”

Bộ Chỉ huy Quân sự n’gor Dak Lak hŏ ƀư lôch jêh sŏk ntil nting ta Nghĩa trang Liệt sĩ La Hai. Aƀaơ đơn vị du rơh an bar rmôt pah kan ta Nghĩa trang Liệt sĩ Xuân Sơn Nam n’hanh Nghĩa trang Liệt sĩ Xuân Phước, xã Đồng Xuân.

Tât aƀaơ, mpôl hăn hŏ kuai 280 tâm lĕ rngôch rnoh 4.019 môch tahen ơm khĭt; rgum geh 105 ntil nting tahen ơm khĭt tŏng nău dơi uănh năl ADN, hôm 175 môch mô hôm tŏng geh ndơ sŏk uănh năl.

Ndrel đah nê, Đội K51 kan nsum đah ăp n’gâng kan ta ntŭk hăn ôp uănh, năl ngăn nău lư ta 8 tâm rnoh 102 xã; dơn geh 4 tơm nău lư mpeh tahen ơm khĭt n’hanh môch tahen ơm khĭt; rgum geh 4 nting tahen ơm khĭt, aƀaơ mô hŏ năl săk da dê.

Tĭng trong nchrăp, ntơm bah aơ tât nar 11/10/2026, nău kuai môch, rgum ntil nting ta ăp nghĩa trang liệt sĩ hôm ƀa ƀă ta n’gor mbra dơi an ƀư tay, nsrôih ƀư lôch jêh pah kan sŏk ntil nting uănh năl ADN bah năp nar 31/10/2026. Wa Đào Mỹ, Groi Kruanh UBND n’gor Dak Lak an gĭt:

“Mpôl hên dôl ntrôl ngăch an ƀư trong kan 500 nar măng năl nău lư bah tahen ơm khĭt. Mpôl hên dôl ra uănh tay trong nchrăp gay jao ngăch nău kan, tâm pă na nê̆, đăp mpăn tât nar 31 khay 10 năm 2026 lah ân ƀư lôch jêh nău kuai môch gay sŏk nting uănh năl. N’hanh dôl nsrôih ndăn ngăch joi nting tahen ơm khĭt tâm dak, n’hanh dôl nsrôih joi trong ƀư gay ndăn joi ngăch ta Campuchia."

Trong kan 500 nar măng mô dơn lah rơh tâm rlong đah mông nar gay mât ndray ăp ntil ADN hôm ƀa ƀă, ma hôm lah njăr trong tĭng ƀư nău way leh di "Ngêt dak kah gĭt tu tơm”, nău dơn kan bah rơh kơn nar aơ đah ăp nuĭh hŏ chôt yor ma đăp mpăn, dah rŏng bah neh dak. Ăp môch dơi pơk luh, ăp ntil nting dơi rgum saơ mpoh tay du nău mpŏng da dê – mpŏng mbra geh tay ăp tahen ơm khĭt dơi kuăl di săk ntơ bah he, geh ƀon tơm, geh rnăk wâl, gay lôch âk năm mpŏng kâp, ăp nô dơi plơ̆ sĭt tay tâm nuih n’hâm ut răm bah ăp rnăk wâl n’hanh tâm nău nkah gĭt nsĭt n’glăp ăp tŏng bah neh dak.