Lôch geh pă dăp tay ăp ntŭk kan hành chính gưl n’gor, Khánh Hoà pơk hvi ntŭk hun hao đah rlău 8.700km vuông neh kơh, 65 ntŭk kan hành chính gưl xã ndrel đah nkual dak lêng dŭt hvi ngăn. Nău nchrăp geh ƀư na nê̆, ƀư tĭng Luật nchrăp nău kan năm 2025 n’hanh geh dơn na nê̆ nău tâm rgop bâh ăp n’gâng kan, ntŭk kan trung ương ndrel đah ƀon lan.

Tĭng nău nchrăp, Khánh Hoà geh nău mpŏng jêng ntŭk tơm tâm rgop nkual Duyên hải Nam Trung Bộ n’hanh Tây Nguyên, sŏk Nha Trang- Đà Lạt ƀư tơm gay ma njêng ntŭk tâm rgop “Dak lêng- gôl yôk”. Nău kan hun hao bâh Khánh Hoà geh uănh năl na nê̆ tĭng nău kan: “ 1 nău mpŏng uănh nsum- 2 jrŏng kan tâm rgop- 3 nău kan hun hao- 4 jrŏng pah kan tơm khlăy”. Tâm nĕ, 4 jrŏng tơm khlăy hun hao bâh Khánh Hoà geh: pâl nđaih nău kan ueh, rgâl mhe mĭn kan n’hanh dịch vụ rnoh mbrô, ƀư nău pah kan ăp ntil drăp ndơ tăch rgâl, công nghiệp nkret njêng, nkra ƀư công nghệ mhe..Mbơh rblang na nê̆ lơn mpeh nău mpŏng kan aơ, wa Châu Ngô Nhân, Giám đốc ntŭk kan Tài chính n’gor Khánh Hoà an gĭt.“Mpeh trong kan ŭnh nar, rgum hun hao ăp ntil ndơ ŭnh nar mhe, ŭnh nar njêng tay, tâm nĕ, geh ŭnh nar hạt nhân ta mpeh ba dâng n’gor Khánh Hoà. Mpeh nău mpŏng hun hao nkuăl ƀon têh, nkual ƀon lan gŭ, ta năp năm 2030, n’gor Khánh Hoà jêng nkuăl ƀon têh bâh Trung ương, njêng 21 nkuăl ƀon têh, tâm nĕ geh 5 nkuăl ƀon têh ntil 2 n’hanh nsrôih nău mpŏng kan bôk năp, nău mpŏng tâm di nkuăl ƀon têh ntil 2 n’hanh 12 nkuăl ƀon têh ntil 3”.

Mpeh nău mpŏng ŭanh tât năm 2050, Khánh Hoà nsrôih an jêng ntŭk kan wăng sa dak lêng têh ta lam dak, hun hao ueh nđir n’hanh tâm ban ta nkual châu Á. Ntoh ngơi ta rơh rƀŭn nchră, Kruanh UBND n’gor Khánh Hoà Nguyễn Việt Hùng lah na nê̆, nău mbơh nău nchrăp kan mô di lah nău nglâ̆ dŭt ma lah nău tơm ƀư an du rơh un hao mhe. Nău dơi an geh veh đah ăp nău kan an săk rnglăy n’hanh nău rgâl têh âk tâm nău rêh ƀon lan. N’gor Khánh Hoà ton mbra hun hao ngăch yơn nâp nâl, nsrôih mô geh rgâl ntŭk gŭ rêh, tơm prăk n’hanh ntil ndơ ơm geh gay ma sŏk nău hun hao năp măt. Gay ma nta nău knơm an rnoh prăk ntuh kơl, Kruanh UBND n’gor Khánh Hoà Nguyễn Việt Hùng lah na nê̆.“An geh rgum doh rklaih ăp nău kŏ văk tâm nău ƀư kŏ jêr hun hao, ngăn lah ăp nău mpeh nchrăp kan, neh ntuh, ntuh kơl, ntrơn ntŭk gŭ n’hanh ăp ntil săm ƀŭt kan hành chính. Nău nchrăp kan lĕ pơk luh du trong hun hao. Nău kan bâh he lah an geh ƀư tĭng nău nĕ, nkre lah đah ntŭk rêh jêng doanh nghiệp, ăp nuĭh ntuh kơl rĭ gâp ŭch ăp ntŭk kan uănh n’hêl na nê̆ nău nchrăp aơ lah ntŭk kan mât đăp mpăn gay ma ntuh kơl jŏ jong ta Khánh Hoà”.