VOV4.M’nông- Ƀư tay bôk nău pah kan đah n’gâng kan, n’gâng kan sŏk nău tâm rgop ƀư lôch nău nchrăp ntrong kan rdâk njêng n’hanh ƀư lôch Ngih dak pháp quyền XHCN Việt Nam tât năm 2030, mpŏng tât năm 2045”, nar 7/7, kruanh dak Nguyễn Xuân Phúc leo rơh rƀŭn nchră pah kan đah Đảng ủy Công an Trung ương, Ban cán sự Đảng Bộ tư pháp. Ta rơh pah kan, ăp nău tâm rgop, tâm nchră uănh năl rnâng kan ntĭm leo lĕ ntĭm leo rdâk njêng nău nchrăp kan na nê̆, ueh tâm di, geh nău kan lý luận n’hanh nău ngăn, nkre lah tâm rgop du đê̆ nău kan mpeh leo ƀư n’hanh pah kan bâh n’gâng kan công an, n’gâng kan tư pháp. Tâm nĕ geh âk nău tâm rgop nkoch mbơh dăn đă rgâl mhe nău leo kan n’hanh pah kan bâh ntŭk kan uănh nđôi, trong leo kan ƀư tĭng bâh ntŭk kan thi hành án an tâm di đah nău rêh ta Việt Nam, mât đăp mpăn, an ueh nău dơi kon nuĭh ta trong rdâk njêng ngih dak, lăp kan ndrel ta lam ntur neh. Ntoh ngơi ntĭm leo rơh pah kan, đah du đê̆ nău geh ngluh mbơh tâm trong kan geh tât n’gâng kan công an, n’gâng kan Tư pháp n’hanh âk ntŭk kan êng, kruanh dak dăn đă rnâng kan ntĭm leo mbra geh djăt tay nău tâm rgop ta ăp rơh pah kan, bâh nĕ rgum nsum gay ma mbơh tơih rnâng kan ntĭm leo uănh n’hêl săch trong kan an tâm di.

          Nuĭh rblang: Thị Đoắt