Ôi ntri (28/3), ta Nhih pah kan kruanh dak, Kruanh dak Lương Cường hŏ ƀư tơm rơh wơt Tổng thống Brasil Luiz Inácio Lula da Silva khâl gưl ngih dak tât Việt Nam. Lôch rnôk ƀư wơt ngăn, Kruanh dak Lương Cường hŏ tâm nchră đah Tổng thống Lula da Silva. 

Ta rơh tâm nchră, Kruanh dak Lương Cường lah rjăp hăn khâl rơh dja gay lah rjăp Brasil uănh khlay n’hanh ŭch rŏng n’hao dăng tâm boh têh jong lam lĕ rngôch Việt Nam tâm lĕ rngôch trong kan tâm boh đah ASEAN n’hanh châu Á-Thái Bình Dương. Bar kruanh tâm ôp, dơn ngoăy ăp trong rƀŏng, trong nkra gay hun hao tay tâm boh têh jong lam lĕ rngôch Việt Nam-Brasil nar lơn ma lăp tâng jru, ngăn ngăn n’hanh geh nău tam, tâm ban kơt tâm ôp mpeh ăp nkô̆ nău tâm nkual n’hanh lam ntŭr neh ndrel uănh khlay. Nkoch mpeh nău khlay hun hao neh dak, n’grŏ tĭng ăp rnoh khlay âk ding, tâm boh ndrel hun hao, n’hanh n’hao nău khlay kan bah ăp dak hun hao ta ăp trong mât bôk kan lam ntŭr neh, bar kruanh tâm ban ŭch n’hao dăng tâm boh kan nsum, tâm boh n’hanh tâm kơl nsum ta ăp mpôl kan dak bah dih, rgum nchră âk ding n’hanh rloh rlău nkual.