Rơh tât khâl geh tâm rnôk nău tâm boh tâm rnglăp têh, tâm rnglăp khlăy n’hanh tâm kơl lĕ rngôch đah Việt Nam n’hanh Lào geh hun hao ueh tay, bar ding lĕ lah na nê̆ nău nsrôih n’hao, n’hao ueh nău tâm boh tâm rnglăp, tâm rŏng têh khlău n’hanh tâm kơl lĕ rngôch Việt Nam- Lào ta nău mhe, tâm di đah nău ngăn ta ntŭk n’hanh ăp dak. Ta rơh tât khâl, kruanh dak Lương Cường lĕ geh rơh tâm nchră khlay đah Tổng Bí thư, Kruanh dak Lào Thongloun Sisoulith; tâm nchră đah kruanh Quốc hội Saysomphone Phomvihane n’hanh Thủ tướng Sonexay Siphandone. Ta ăp rơh tâm nchră, tâm mâp, bar ding lĕ tâm mbơh n’hanh dơn ngoăy mpeh ăp trong kan têh hun hao nău tâm boh kan ndrel đah 2 dak tâm let năp tay, tâm nĕ tâm ban ŭch ndâk nsơm nău tâm boh kan chính trị geh nău knơm, dăch ndrel, mât ăp rơh tât khâl, tâm mâp gâl têh n’hanh ăp gâl ƀa ƀơ, uănh khlăy ntrôl dăng nău tâm nđur tâm kơl đah ƀon lan 2 dak đah âk trong kan ueh, tâm di.