Ôi 6/8, ta Jay Quốc hội, Kruanh Quốc hội Trần Thanh Mẫn râng n’hanh rđău đă ta Tâm nchră bah Quốc hội mpeh groi nđôi đah nkô̆ "Groi nđôi bah Quốc hội gay nta trong dơh hun hao". 

Ta rơh rgum nchră, Groi kruanh Quốc hội an gĭt, Ủy ban thường vụ Quốc hội mbra djăt ăp nău rgop bah đại biểu Quốc hội, gay let năp tay rgâl nkra Luật hăn groi nđôi bah Quốc hội n’hanh Hội đồng nhân dân hao dăn Quốc hội mĭn uănh, n’gluh an dŏng ta rơh hop tâl 10, Quốc hội khóa 15 tât gay tâm nchră ăp nghị quyết groi nđôi tĭng ƀư jăp ngăn ngăn. Kruanh Quốc hội dăn đă, ăp nău rblang luh n’hanh nuĭh ntơh măt râng tâm ôp, tâm nchră rgum, lăp sŏng tâm nkô̆ khlay, dăn đă ăp trong nkra na nê̆ n’hanh ngăn ngăn. Dŭt jêh rgum nchră, Ban Tổ chức mbra rdâk njêng siƀŭt mbơh lam lĕ rngôch njuăl Quốc hội, Chính phủ, ăp Bộ, n’gâng kan n’hanh n’gor gay năn rhŏ dŏng nău rgâl lam lĕ rngôch Luật hăn groi nđôi bah Quốc hội, Hội đồng nhân dân n’hanh rgâl nkra, kơi ntop ăp siƀŭt pháp luật geh tât.