VOV4.M’nông- Ta ntŭk kan kruanh dak, kruanh dak Nguyễn Xuân Phúc lĕ vơt wa Bounthong Chitmany, Ủy viên Bộ chính trị, rnâng kan Ban Bí thư Trung ương Đảng nhân dân cách mạng Lào, groi kruanh dak CHDCND Lào n’hanh mpôl đại biểu gâl têh Đảng, ngih dak Lào dôl gŭ khâl ngăn ta Việt Nam.

Kruanh dak Nguyễn Xuân Phúc lah na nê̆ Đảng, ngih dak n’hanh ƀon lan Việt Nam dŭt uănh khlăy, nsrôih mât n’hanh mô rlu bun dăp, hun hao nău tâm boh tâm rnglăp têh kuăng, tâm rnglăp ueh n’hanh tâm kơl lĕ rngôch Việt Nam- Lào. Bar hê nuĭh leo kan lah na nê̆ nău khlăy bâh  “Năm tâm rnglăp tâm kơl Việt Nam-Lào, Lào- Việt Nam năm 2022” đah nău kan mbơh tơih, ntĭm nti ăp nuĭh ƀon lan, ngăn lah rơh mom bâh 2 dak, mpeh nău way ơm tâm boh tâm rnglăp têh khlăy, mô dơi tâm nglah đah Việt Nam n’hanh Lào. Bar ding tâm ban ŭch kơl tay nău nsrôih n’hao săk rnglăy tâm kơl ntĭm nti, dak si tâm nđur ƀon lan n’hanh tâm kơl đah ăp ntŭk, geh tâm rgop tay na nê̆, tâm kơl ndrel ta ăp rơh tâm mâp lam ntur neh.

Nuĭh rblang: Thị Đoắt