VOV4.M’nông- Kêng măng nar 21/7, ta ntŭk kan kruanh dak, kruanh dak Nguyễn Xuân Phúc, Ủy viên Bộ chính trị, kruanh rnâng kan ntĭm leo rdâk njêng trong kan “nău kan rdâk njêng n’hanh ƀư lôch ngih dak pháp quyền XHCN Việt Nam tât năm 2030, mpŏng kan tât năm 2045” leo rơh pah kan đah rnâng kan Nội chính trung ương n’hanh rnâng kan Tổ Biên tập ăp bôk nău kan, nuĭh kan khoa học mpeh ƀư lôch trong kan.

Ntoh ngơi ta rơh ntĭm leo ta rơh pah kan, kruanh dak Nguyễn Xuân Phúc rnê âk rnâng kan Nội chính trung ương, ăp nuĭh kan khoa học, nuĭh kan pháp lý lĕ geh mbơh tơih răng dăng, ƀon lan ƀư tơm, kloh rjăp mpeh ăp nău bâh trong kan, nkre lah kơp dơn ăp nău nsrôih, nău dơn kan âk bâh tổ biên tập rdâk njêng bôk nău kan. Mpeh đah du đê̆ nkô̆ nău mhe geh nkoch mbơh tâm nău nchrăp pah kan, kruanh dak lah na nê̆ an geh tâm nchră na nê̆, mbơh rblang tâm di, kloh rjăp. Ăp ntil săm ƀŭt rhŏ mât đăp mpăn tâm ban, na nê̆ nđâp mpeh nău kan pháp lý n’hanh ăp ntŭk kan chính trị. Kruanh dak dăn đă Tổ biên tập rdâk njêng bôk nău kan geh gĭt ăp nău tâm rgop ta rơh pah kan, ngăch ndăn uănh nđôi, ntop ƀư lôch nău nchrăp trong kan gay ma geh dăn tay nău tâm rgop ta rơh rƀŭn nchră tal puăn bâh rnâng kan ntĭm leo.

Nuĭh rblang: Thị Đoắt